روس کی یوکرین کو مزید اسلحہ دینے پر امریکا کو وارننگ

لندن: روس نے امریکا کویوکرین کو مزید ہتھیار بھیجنے کے حوالے سے خبردار کیا ہے کہ ہتھیاروں کی ترسیل تنازع کو ہوا دے رہی ہے اور اس سے مزید نقصان ہو گا۔

روس کے 24 فروری کو یوکرین پر حملے کے بعد تاحال جاری کشیدگی کی وجہ سے دنیا کی دو بڑی ایٹمی طاقتوں روس اور امریکا کے درمیان وسیع تر تصادم کا خدشہ پیدا ہو گیاہے۔

یوکرین میں نیٹو افواج بھیجنے کا امکان مسترد کرتے ہوئے امریکااور اس کے یورپی اتحادیوں نے یوکرین کو ڈرون، ہووٹزر ہیوی آرٹلری، طیارہ شکن اسٹنگر اور اینٹی ٹینک جیولن میزائل جیسے ہتھیار فراہم کیے ہیں۔

مزید پڑھیں:روس یوکرین جنگ پھیلنے کے خدشات

امریکہ میں روس کے سفیر اناتولی اینٹونوف نے کہا ہے کہ اس طرح کے ہتھیاروں کی فراہمی کا مقصد روس کو کمزور کرنا ہے اور مغربی ممالک یوکرین میں تنازع کو بڑھا رہے ہیں اور کسی قسم کے امن معاہدے تک پہنچنے کی کوششوں کو نقصان پہنچا رہے ہیں۔

2017 سے واشنگٹن میں سفیر کے طور پر خدمات انجام دینے والے اناتولی اینٹونوف کاکہنا ہے کہ واشنگٹن کو ایک سرکاری سفارتی نوٹ بھیجا گیا ہے تاہم امریکا نے تاحال اس کا کوئی جواب نہیں دیا ۔