گوگل نیوز پر ہمیں فالو کریںافواج پاکستان کے شعبہ تعلقات عامہ آئی ایس پی آر نے دہشت گردی کے خلاف جنگ اور وطن کے دفاع میں جان قربان کرنے والے شہداء کو خراجِ عقیدت پیش کرنے کے لیے ایک نیا ملی نغمہ جاری کیا ہے جس کا عنوان ہے قوم کے شہیدو، تمہیں سلام۔
یہ نغمہ اُن تمام بہادر سپاہیوں کی قربانیوں کو یاد کرتا ہے جنہوں نے پاکستان کی سلامتی اور امن کے لیے اپنی جانیں نچھاور کیں۔ نغمے میں واضح پیغام دیا گیا ہے کہ شہداء کو قوم کبھی نہیں بھولتی، بلکہ وہ ہمیشہ دلوں میں زندہ رہتے ہیں۔
نغمہ نہ صرف فوجی جوانوں کو خراج تحسین پیش کرتا ہے بلکہ اُن خواتین اور بچوں کی قربانیوں کو بھی یاد کرتا ہے جو دہشت گرد حملوں میں شہید ہوئے۔ نغمے کے بولوں میں یہ جذبات شامل ہیں کہ ہر پاکستانی ان شہداء پر فخر کرتا ہے اور اُن کے خون کے ایک ایک قطرے کو سلام پیش کرتا ہے۔
آخر میں نغمے میں اس عزم کا اظہار بھی کیا گیا ہے کہ وطن کے دفاع میں کوئی کسر نہیں چھوڑی جائے گی اور پاکستان کی سرزمین کی حفاظت آخری سانس اور خون کے آخری قطرے تک کی جائے گی۔
یہ نغمہ نہ صرف جذبات کو ابھارتا ہے بلکہ قوم کو اپنے ہیروز کی قربانیوں کو یاد رکھنے اور ان کے مشن کو جاری رکھنے کی ترغیب بھی دیتا ہے۔
