شہباز شریف ایک روزہ دورے پر کراچی پہنچ گئے

کراچی: پاکستان مسلم لیگ (ن) کے صدر اور قومی اسمبلی میں اپوزیشن لیڈر شہباز شریف ایک روزہ دورے پر کراچی پہنچ گئے۔

مسلم لیگ (ن) کے رہنما احسن اقبال ، عطا اللہ تارڑ ، ملک احمد خان اور رانا تنویر حسین بھی شہبازشریف کے ہمراہ آئے ہیں۔

پارٹی ذرائع کے مطابق شہباز شریف بلوچستان نیشنل پارٹی کے سربراہ سردار اختر مینگل کی رہائش گاہ جائیں گے اورسردار عطا اللہ مینگل کی وفات پر تعزیت اور فاتحہ خوانی کریں گے۔شہباز شریف دورہ کراچی کے موقع پارٹی اجلاس کی بھی صدارت کریں گے۔

واضح رہے کہ شہباز شریف اگست کے شروع میں پاکستان ڈیموکریٹک موومنٹ کی ایک عوامی ریلی میں شرکت کے لیے تین روزہ دورے پر کراچی آئے تھے۔

مزید پڑھیں:شہباز شریف پارٹی اختلافات پر توجہ دیں

انہوں نے سابق صدر ممنون حسین اور پاکستان مسلم لیگ فنکشنل کے صدر پیر پگارا کی رہائش گاہوں پر جا کر تعزیت کی تھی جبکہ اپنے تین روزہ قیام کے دوران تاجر برادری سے بھی خطاب کیاتھا۔

یاد رہے کہ قومی اسمبلی میں قائد حزب اختلاف شہباز شریف اور چیئرمین پیپلزپارٹی بلاول بھٹو زرداری کے درمیان چند روز قبل ٹیلی فونک رابطہ ہوا ہے۔

ٹیلی فونک رابطے کے دوران دونوں رہنماؤں نے مجموعی ملکی سیاسی صورت حال پر تبادلہ خیال کیا، اس موقع پر الیکشن کمیشن کے اراکین کی تقرری کے معاملے پر بھی گفتگو ہوئی۔