گوگل نیوز پر ہمیں فالو کریںپاکستان کونسل برائے تحقیق پانی کے وسائل کی تازہ ترین رپورٹ کے مطابق ملک بھر میں 26 بوتل بند پانی کی برانڈز انسانی استعمال کے لیے غیر محفوظ پائی گئی ہیں جن میں سے چھ برانڈز کراچی میں فروخت ہو رہی ہیں۔
جولائی تا ستمبر 2025 کے دوران پاکستان میں کل 205 بوتل بند پانی کے نمونے ٹیسٹ کیے گئے، جن میں سے 28 نمونے کراچی کے مختلف علاقوں سے لیے گئے۔
رپورٹ میں بتایا گیا ہے کہ یہ برانڈز کیمیائی اور صحت کے معیار پر پورا نہیں اترتیں۔ کچھ نمونوں میں سوڈیم کی مقدار زیادہ تھی، جو دل کی بیماری یا بلند فشار خون والے افراد کے لیے خطرناک ہو سکتی ہے، جبکہ پانچ برانڈز میں ارسنک کی سطح حد سے زیادہ پائی گئی۔
کچھ برانڈز میں ٹوٹل ڈیزالوڈ سالڈز (ٹی ڈی ایس) اور پوٹاشیم کی مقدار بھی مقررہ حد سے زیادہ تھی، جس کی وجہ سے یہ پانی انسانی استعمال کے لیے غیر محفوظ قرار پایا۔
کراچی میں غیر محفوظ قرار دی گئی برانڈز میں Pure Drinking Water، Fresh Aqua، Asia Healthy Drinking Water شامل ہیںجو نقصان دہ جراثیم سے متاثر پائی گئی۔
اسی طرح Premium Drinking Water اور Maya Premium Drinking Water بھی بیکٹیریل آلودگی کی وجہ سے غیر محفوظ قرار دی گئی۔
مزید برانڈز جیسے Purifa اور Pure Drinking Water زیادہ سوڈیم کی موجودگی کے باعث انسانی استعمال کے لیے نامناسب ہیں۔
سوڈیم کی زیادہ مقدار رکھنے والی دیگر برانڈز میں Ultsun شامل ہے جبکہ ارسنک سے متاثرہ برانڈز میں Natural Pure Life، Aqua Nest، Premium Safa Pure Water، Pew Pani Bottled Drinking Water، Volga شامل ہیں۔
پوٹاشیم کی زیادہ سطح رکھنے والی برانڈز میں My Pure Water اور Smart Pure Life اور TDS کی خلاف ورزی کرنے والی برانڈز بھی خطرے کی کیٹیگری میں رکھی گئی ہیں۔
مزید برانڈز جن میں نقصان دہ بیکٹیریا موجود تھے، ان میں A2Z Pure Drinking Water، New Mehran، Zalmi، Pure Life، Dir Drinking Water، Dream Pure شامل ہیں۔ دیگر آلودہ برانڈز میں Gulf، Crystal Aqua، Ruha Water، Iceberg، Lasani، Volga شامل ہیں، جو معیار میں وسیع مسائل کی نشاندہی کرتے ہیں۔
شہریوں کو ہدایت کی گئی ہے کہ بوتل بند پانی خریدنے سے پہلے اس کی تصدیق اور سرٹیفیکیشن کی تصدیق کریں اور صرف وہ پانی استعمال کریں جو تصدیق شدہ اور لیبارٹری میں ٹیسٹ شدہ ہو، تاکہ صحت کے خطرات سے بچا جا سکے۔
