کیچ میں دہشت گردوں کا سیکورٹی فورسز پر حملہ، ایک فوجی جوان شہید

کوئٹہ: بلوچستان کے ضلع کیچ میں سیکورٹی فورسز کی چوکی پر دہشت گردوں کی فائرنگ کے نتیجے میں پاک فوج کا ایک سپاہی شہید ہو گیا ہے۔

پاک فوج کے شعبہ تعلقات عامہ (آئی ایس پی آر) کے مطابق دہشتگردوں کی سیکورٹی فورسز کی چیک پوسٹ پر فائرنگ کے نتیجے میں سپاہی محمد قیصر شہید ہوگیا۔ پاک فوج کی جوابی فائرنگ کے نتیجے میں دہشتگرد فرار ہو گئے جن کی تلاش کے لیے علاقے میں سرچ آپریشن جاری ہے۔

یہ بھی پڑھیں 

ہنگو میں دہشت گردوں کے حملے میں پاک فوج کا سپاہی شہید

انسانی المیے سے بچنے کے لیے دنیا افغانستان کی مدد کرے، آرمی چیف

بدھ کے روز ایک اور واقعے میں پاک فوج کا ایک اور سپاہی اس وقت شہید ہوا تھا جب دہشت گردوں نے خیبر پختونخوا کے ضلع ہنگو کے علاقے تھل میں ایک فوجی چوکی پر فائرنگ کی تھی۔

ڈی جی آئی ایس پی آر کی جانب سے جاری ہونے والےبیان میں کہا گیا تھا کہ پاک فوج کی بھرپور جوابی فائرنگ کے نتیجے میں دہشتگرد موقع سے فرار ہو گئے تھے۔ فائرنگ کے تبادلے میں شہید ہونے والے سپاہی کی شناخت وقاص کے نام سے ہوئی تھی۔

ترجمان آئی ایس پی آر کے مطابق شہید سپاہی کی شناخت 26 سالہ وقاص کے نام سے ہوئی ہے۔ شہید فوجی جوان کا تعلق ضلع مانسہرہ سے ہے۔

آئی ایس پی آر کا مزید کہنا ہے کہ علاقے میں دہشتگردوں کے خاتمے کے لیے سیکورٹی فورسز کی جانب سے سرچ آپریشنز کا سلسلہ جاری ہے۔

واضح رہے کہ 2 اکتوبر کو دہشتگردوں کے ایک حملے میں فرنٹیئر کور (ایف سی) کے چار سپاہی اور ایک لیویز سب انسپکٹر شہید ہوئے تھے۔

ترجمان آئی ایس پی آر کے مطابق اس سے قبل 18 اکتوبر کو شمالی وزیرستان کے ضلع سپین وام میں دہشت گردوں نے سکیورٹی فورسز کی ایک چوکی پر فائرنگ کرتے ہوئے پاک فوج کے ایک سپاہی کو شہید کردیا تھا۔