گوگل نیوز پر ہمیں فالو کریںکاروباری ہفتے کے تیسرے روز بدھ 6 اگست 2025 کو پاکستان اسٹاک ایکسچینج میں مثبت رجحان دیکھا جا رہا ہے، صبح 10:30 بجے تک 100انڈیکس 900 سے زائد پوائنٹس کے اضافے سے ایک لاکھ 43 ہزار 991 پر ٹریڈ کر رہا تھا جو کہ پچھلے سیشن کے 143,037 پوائنٹس کے مقابلے میں نمایاں بہتری کو ظاہر کرتا ہے۔
منگل کے روز بھی مارکیٹ میں تیزی کا رجحان دیکھا گیا تھا جہاں KSE-100 انڈیکس میں 984 پوائنٹس کا اضافہ دیکھا گیاجو کہ 0.69 فیصد کی مثبت ترقی تھی جبکہ 100 انڈیکس 142,052 پوائنٹس سے بڑھ کر 143,037 پوائنٹس پر بند ہوا۔
دن بھر میں مجموعی طور پر 549,719,494 شیئرز کا لین دین ہوا، جو پچھلے ٹریڈنگ سیشن کے 666,372,806 شیئرز سے کم تھا۔ شیئرز کی مجموعی مالیت 37.040 ارب روپے رہی، جبکہ پچھلے سیشن میں یہ 42.924 ارب روپے تھی۔
اسٹاک مارکیٹ میں 484 کمپنیوں نے اپنے شیئرز کا لین دین کیا۔ ان میں سے 239 کمپنیوں کے شیئرز کی قیمتوں میں اضافہ ہوا، جبکہ 217 کو نقصان اٹھانا پڑا۔ 28 کمپنیوں کے شیئرز کی قیمتیں مستحکم رہیں۔
ماہرین کے مطابق، سرمایہ کاروں کا اعتماد معاشی حالات میں بتدریج بہتری اور مثبت پالیسی اقدامات کی وجہ سے بڑھ رہا ہے۔ عالمی منڈیوں کے استحکام اور ملکی معیشت میں بہتری کے اشاروں نے بھی مارکیٹ کی اس تیزی کو تقویت دی ہے تاہم سرمایہ کاروں کو مشورہ دیا جاتا ہے کہ وہ مارکیٹ کے اتار چڑھاؤ پر نظر رکھیں اور حکمت عملی کے ساتھ سرمایہ کاری کریں۔
پاکستان اسٹاک ایکسچینج میں یہ مسلسل تیزی سرمایہ کاروں کے لیے امید کی کرن ثابت ہو رہی ہے اور توقع ہے کہ آنے والے دنوں میں بھی مارکیٹ مثبت رجحانات دکھائے گی۔
