گوگل نیوز پر ہمیں فالو کریںسعودی عرب کے دارالحکومت ریاض میں ہونے والے جوائے فورم 2025 میں بالی وُڈ کے تین بڑے ستارے شاہ رخ خان، سلمان خان اور عامر خان ایک ساتھ اسٹیج پر جلوہ گر ہوئے۔ یہ نایاب اور بے حد متوقع لمحہ 16 اور 17 اکتوبر کو منعقدہ ایونٹ کے دوران پیش آیا جس نے دنیا بھر میں شائقین کی توجہ حاصل کر لی۔
اس موقع پر تینوں سپر اسٹارز نے کھل کر گفتگو کی اپنے کیریئر ایک دوسرے کے ساتھ تعلقات اور ایک ممکنہ مشترکہ فلم کے حوالے سے خیالات کا اظہار کیا۔
شاہ رخ خان نے سلمان اور عامر کی جدوجہد اور کام سے متاثر ہونے کا اعتراف کرتے ہوئے کہا کہ وہ دونوں کو نہ صرف سراہتے ہیں بلکہ ان کے سفر سے سبق بھی لیتے ہیں۔
سلمان خان نے شاہ رخ کی کامیابی کو سراہتے ہوئے کہا کہ انہوں نے بغیر کسی فلمی پس منظر کے یہ مقام حاصل کیا جس پر شاہ رخ نے جواب دیا کہ میں بھی فلمی خاندان سے ہوں۔ سلمان کا خاندان میرا خاندان ہے اور عامر کا بھی۔
اس دوران اداکاروں نے شہرت، عاجزی اور مداحوں سے تعلق پر بھی گفتگو کی۔ شاہ رخ نے کہا کہ ہم خود کو مداحوں کی خدمت میں سمجھتے ہیں، اور ہمیں اُنہیں مداح کے بجائے ہم سے محبت کرنے والے لوگ کہنا چاہیے۔
جب تینوں خانز سے ایک ساتھ فلم کرنے کے امکان کے بارے میں پوچھا گیا تو شاہ رخ خان نے کہا کہ یہ ایک خواب ہی ہے، اور جب بھی پورا ہوگا، بہت خاص ہوگا جبکہ اس اشارے نے مداحوں میں زبردست جوش اور قیاس آرائیوں کو جنم دیا۔
گفتگو کے دوران سلمان خان نے شاہ رخ کے بیٹے آریان خان کی ڈائریکشن میں دلچسپی کی تعریف کی اور ہنستے ہوئے کہا کہ امید ہے وہ اپنے والد سے بھی آگے جائے گا۔
عامر خان نے خود کو چاہنے کے باوجود شُہرت سے دور رہنے والا اسٹار قرار دیا اور کہا کہ وہ تینوں خوش نصیب ہیں کہ بھارت میں پیدا ہوئے جہاں لوگوں سے فلموں کا گہرا جذباتی رشتہ ہے۔
ان تینوں کی اسٹیج پر موجودگی ایونٹ کا سب سے بڑا لمحہ ثابت ہوئی جس میں دنیا بھر سے تفریح، کھیل اور میڈیا کی نامور شخصیات نے شرکت کی۔
