لاہور میں گھر میں آگ لگنے سے 3 بچے جھلس کر جاں بحق،5افرادزخمی

لاہور :جمعہ کی صبح گھر میں آگ لگنے سے تین بچے ہلاک اور پانچ افرادشدید زخمی ہو گئے، آتشزدگی کی وجوہات کا پتا نہ چل سکا۔

چونگی امر سدھو کے علاقے گلستان کالونی میں گھر میں آگ لگنے سے ایک ہی خاندان کے 8 افراد جھلس گئے، جس کے نتیجے میں 2 چھوٹی بچیاں اور ایک بچہ جاں بحق جبکہ والدین سمیت 5 افراد شدید زخمی ہوگئے۔

ریسکیو ٹیموں نے ایک جوڑے اور ان کے تین بچوں سمیت پانچ زخمیوں کو علاج کے لیے جناح اسپتال پہنچایا ۔جاں بحق ہونے والے بچوں کی شناخت دو سالہ علی عباس، چار سالہ زہرہ اور چھ سالہ لاریب کے نام سے ہوئی ہے۔

مزید پڑھیں:لاہورمیں گھر سے لیڈی ڈاکٹر، جوان بیٹے اور بیٹیوں سمیت4افراد کی لاشیں برآمد

زخمیوں کی شناخت 40 سالہ مراتب علی اور 35 سالہ فرزانہ مراتب کے نام سے ہوئی ہے۔ زخمی بچوں کے نام علی رضا، علی حسن اور علی حمزہ ہیں۔گھر میں آگ لگنے کے حوالے سے تحقیقات کی جارہی ہے۔

واضح رہے کہ دو روز قبل لاہور میں ایک گھر سے لیڈی ڈاکٹر اور 3 بچوں کی لاشیں برآمد ہوئی ہیں جن میں جواں سال بیٹا اور 2 بیٹیاں شامل ہیں، پولیس کا کہنا ہے کہ لاشوں کی برآمدگی کا واقعہ کاہنہ کے علاقے میں پیش آیا۔

کاہنہ کی رہائشی 45 سالہ ڈاکٹر ناہید، ان کا 20 سالہ بیٹا تیمور، 15 سالہ اور 9 سالہ بیٹیاں ماہ نور اور فاطمہ کے قتل کی وجوہات بھی معلوم نہیں ہوسکیں۔ آئی جی پنجاب نے واقعے کا نوٹس لے لیا۔