گوگل نیوز پر ہمیں فالو کریںکراچی: شہر قائد میں دو موٹر سائیکل سوار مبینہ ڈاکو اس وقت عوام کے ہتھے چڑھ گئے جب وہ واردات کی کوشش کر رہے تھے، موقع پر موجود شہریوں نے دونوں ملزمان کو پکڑ کر شدید تشدد کا نشانہ بنایا جس کی ویڈیو سوشل میڈیا پر وائرل ہو چکی ہے۔
چیخ و پکار سن کر اہلِ محلہ اور راہگیر موقع پر جمع ہو گئے اور دونوں ڈاکوؤں کو دبوچ لیا۔ عینی شاہدین کے مطابق ایک ڈاکو نے فرار ہونے کی کوشش کی لیکن عوام نے اسے بھی پکڑ کر دوسرے ساتھی کے ساتھ زمین پر لٹا دیا۔
اس کے بعد متعدد افراد نے ڈنڈوں، لکڑیوں اور مکوں سے دونوں پر شدید تشدد کیا۔ ویڈیو میں دیکھا جا سکتا ہے کہ ڈاکو رحم کی اپیل کر رہے ہیں لیکن عوام کا غصہ ٹھنڈا نہیں ہو رہا۔
بعد ازاں کچھ بزرگ شہریوں نے مداخلت کر کے مزید تشدد سے روکا اور پولیس کو طلب کیا۔ پولیس نے موقع پر پہنچ کر دونوں زخمی ڈاکوؤں کو گرفتار کر لیا اور طبی امداد کے لیے اسپتال منتقل کر دیا۔
واقعے کے بعد سوشل میڈیا پر شہریوں کی جانب سے ملے جلے ردعمل کا اظہار کیا جا رہا ہے۔
کچھ صارفین نے عوام کے اقدام کو فطری ردعمل قرار دیا جبکہ دیگر نے قانون کو ہاتھ میں لینے کی مخالفت کی اور قانون نافذ کرنے والے اداروں سے اپیل کی کہ وہ مؤثر کارروائی کریں تاکہ عوام کو خود اقدام کرنے پر مجبور نہ ہونا پڑے۔
