لڑکیوں کے اسکول بند کرنے کا حکم، امریکا اور طالبان کے مابین مذاکرات منسوخ

کابل / واشنگٹن: لڑکیوں کے اسکول بند کرنے کا حکم دوبارہ جاری کرنے پر امریکا کی جو بائیڈن حکومت نے طالبان سے مذاکرات منسوخ کردئیے ہیں۔ افغانستان اور امریکا کے مابین مذاکرات دوحہ میں ہونے والے تھے۔

تفصیلات کے مطابق دوحہ میں جو بائیڈن اور طالبان حکومتیں معاشی امور پر مذاکرات کرنے والی تھیں، تاہم لڑکیوں کے اسکول کھولنے کے بعد دوبارہ بند کرنے کے اعلان پر طالبان سے مذاکرات منسوخ کیے گئے۔ امریکا کا کہنا ہے کہ طالبان کا فیصلہ انتہائی مایوس کن ہے۔

یہ بھی پڑھیں:

یوکرین میں بھوک اور بدحالی کے ڈیرے، تھیٹر پر حملے میں 300 افراد ہلاک

امریکی حکام اور طالبان کے مابین افغانستان کے مرکزی بینک اور کرنسی کے متعلق امور کے حوالے سے بات چیت متوقع تھی۔ عالمی میڈیا کا کہنا ہے کہ مذاکرات کی منسوخی سے یہ واضح ہے کہ طالبان کے اقدامات عالمی برادری کی امداد پر منفی اثرات مرتب کر رہے ہیں۔ 

امریکی محکمۂ خارجہ کے ترجمان نے میڈیا نمائندگان سے گفتگو کے دوران کہا کہ طالبان حکومت نے عالمی برادری اور افغان عوام سے جو وعدے کیے تھے، لڑکیوں کے اسکول بند کرنے کا فیصلہ اس کا یو ٹرن ہے۔ امریکا نے دوحہ سمیت دیگر ملاقاتیں بھی منسوخ کردیں۔

ترجمان محکمۂ خارجہ نے مزید کہا کہ امریکا کا ایک واضح مؤقف ہے کہ طالبان ہمارے ساتھ اہم معاملات پر یو ٹرن لے رہے ہیں۔ واضح رہے کہ طالبان اور امریکا کے مابین مذاکرات کے دوران اقوامِ متحدہ اور عالمی بینک کے نمائندے بھی شریک ہونے والے تھے۔