گوگل نیوز پر ہمیں فالو کریںعالمی نمبر ایک ٹینس اسٹار آرینا سابالینکا نے آسٹریلین اوپن سے قبل شاندار فارم کا مظاہرہ کرتے ہوئے برسبین انٹرنیشنل کا ٹائٹل مسلسل دوسری مرتبہ اپنے نام کر لیا۔فائنل میں انہوں نے یوکرین کی مارٹا کوسٹیاک کو سیدھے سیٹوں میں شکست دے کر اپنی برتری ثابت کر دی۔
فائنل مقابلے میں سابالینکا نے ورلڈ نمبر 26 مارٹا کوسٹیاک کو 6-4، 6-3 سے شکست دی۔ یہ میچ صرف 1 گھنٹہ 18 منٹ میں مکمل ہوا۔ سابالینکا کی یہ جیت اس لحاظ سے بھی خاص رہی کہ انہوں نے پورے ٹورنامنٹ میں ایک بھی سیٹ نہیں ہارا جو ان کی شاندار تیاری اور اعتماد کو ظاہر کرتا ہے۔
مارٹا کوسٹیاک نے فائنل تک پہنچنے کے لیے بہترین کارکردگی دکھائی تھی اور انہوں نے راستے میں ٹاپ 10 کھلاڑیوں جیسیکا پیگولا، میرا اینڈریوا اور امانڈا اینیسی مووا کو شکست دی تاہم فائنل میں وہ سابالینکا کی طاقتور اور درست شاٹس کا مقابلہ نہ کر سکیں۔
میچ کے اہم لمحات
پہلے سیٹ میں سابالینکا نے شاندار آغاز کرتے ہوئے 3-0 کی برتری حاصل کی تاہم کوسٹیاک نے مقابلہ برابر کرتے ہوئے اسکور 3-3 کر دیا۔ اس کے بعد سابالینکا نے جارحانہ کھیل پیش کرتے ہوئے پہلا سیٹ اپنے نام کر لیا۔ دوسرے سیٹ میں بھی سابالینکا نے 3-0 کی برتری حاصل کی اور حریف کو واپسی کا کوئی موقع نہ دیا۔
آسٹریلین اوپن کے لیے مضبوط تیاری
یہ کامیابی سابالینکا کے لیے آسٹریلین اوپن (جو 18 جنوری سے شروع ہو رہا ہے) کے دفاع کی مضبوط بنیاد بن گئی ہے۔ اگرچہ گزشتہ سال وہ ٹائٹل سے محروم رہی تھیں، تاہم اب وہ تیسری مرتبہ آسٹریلین اوپن اور مجموعی طور پر پانچواں گرینڈ سلیم ٹائٹل جیتنے کی خواہاں ہیں۔
میچ کے بعد گفتگو کرتے ہوئے سابالینکا نے اپنی ٹیم کا شکریہ ادا کیا اور مزاحیہ انداز میں کہا کہ میری ٹیم کا شکریہ جو مجھے سنبھالتی ہے۔ میں واقعی سب سے مشکل شخص ہوں اور آپ وہ لوگ ہیں جو مجھے سب سے بہتر طریقے سے سنبھال سکتے ہیں۔
انہوں نے اپنے بوائے فرینڈ کی جانب اشارہ کرتے ہوئے ہنستے ہوئے کہا کہ میرے بوائے فرینڈ کا بھی شکریہ۔ امید ہے جلد ہی میں آپ کو کچھ اور کہوں گی، ٹھیک ہے؟۔
مارٹا کوسٹیاک کا جذباتی بیان
میچ کے بعد مارٹا کوسٹیاک نے اپنے ملک یوکرین کی صورتحال پر بات کرتے ہوئے کہا کہ وہ ہر روز دل کے بوجھ کے ساتھ کھیلتی ہیں۔ ان کا کہنا تھا کہ یوکرین میں لوگ شدید سردی، بجلی اور گرم پانی کی قلت جیسے مسائل کا سامنا کر رہے ہیں جہاں درجہ حرارت منفی 20 ڈگری تک گر چکا ہے۔
