واٹس ایپ کا مختلف گروپس ایک جگہ کرنے کیلئے فیچر متعارف کرانیکا فیصلہ

موبائل میسیجنگ کی معروف ایپلیکیشن واٹس ایپ نے مختلف گروپ کو ایک جگہ جمع کرنے کیلئے نیا فیچر متعارف کرانے کا فیصلہ کیا ہے جس کی تیاریاں شروع کردی گئیں۔

تفصیلات کے مطابق واٹس ایپ گروپس کے متعلق نیا فیچر متعارف کرانے کی تیاریوں میں مصروف ہے۔ کمیونٹیز کے نام سے نیا فیچر متعارف کرایا جائے گا جس کے تحت متعدد واٹس ایپ گروپس ایک جگہ جمع کرکے ان کے پیغامات دیکھے جاسکیں گے۔

یہ بھی پڑھیں:

ٹوئٹر ویڈیو میں آٹوکیپشن کا فیچر بھی پیش کردیا گیا

جیمز ویب ٹیلی اسکوپ کئی ماہ تاخیر کے بعد خلا میں روانہ کردی گئی

بے شمار سوشل میڈیا صارفین واٹس ایپ کے متعدد گروپس کے ممبر بن کر سردردی کا شکار رہتے ہیں کیونکہ مختلف گروپس سے آنے والے پیغامات کو ایک ساتھ دیکھنا ممکن نہیں ہوتا۔ ایک گروپ کا نیا پیغام آتے ہی دیگر گروپس نیچے چلے جاتے ہیں۔

کمیونٹیز نامی فیچر واٹس ایپ گروپس کو ایک جگہ اکٹھا کرنے میں مدد دے گا۔ بین الاقوامی میڈیا کا کہنا ہے کہ صارفین 10 گروپس کو ایک الگ فولڈر میں جمع کرکے رکھ سکیں گے۔ واٹس ایپ نے آئی او ایس آپریٹنگ سسٹم پر فیچر کا بیٹا ورژن متعارف کرادیا۔

آزمائشی طور پر متعارف کرائے جانے والے فیچر کے تحت واٹس ایپ کے مختلف گروپس کو ایک فولڈر میں رکھا جاسکےگا اور کسی بھی گروپ کو فولڈر میں شامل یا خارج کیا جاسکے گا۔ کمیونٹیز کو اپنی مرضی کے نام بھی دئیے جاسکیں گے۔