گوگل نیوز پر ہمیں فالو کریںمحکمہ موسمیات کے مطابق کراچی میں سردی کی شدت میں کچھ کمی دیکھی جا رہی ہے، لیکن آنے والے دنوں میں ایک بار پھر موسم مزید سرد ہو سکتا ہے۔
گزشتہ 24 گھنٹوں کے دوران کراچی میں کم سے کم درجہ حرارت 13.5 ڈگری سینٹی گریڈ ریکارڈ کیا گیا ہے۔ شہر کراچی میں شمال کی سمت سے ہوائیں 6 کلومیٹر فی گھنٹہ کی رفتار سے چل رہی ہیں اور ہوا میں نمی کا تناسب 58 فیصد ہے، جس کے باعث موسم سرد اور خشک محسوس ہو رہا ہے۔
محکمہ موسمیات کے مطابق آج اور کل موسم میں معمولی بہتری کی توقع ہے۔ لیکن 4 جنوری سے کراچی کا درجہ حرارت سنگل ڈیجٹ میں جا سکتا ہے، جس کی وجہ سے سردی کی شدت میں اضافہ ہوگا۔
محکمہ موسمیات کا یہ بھی کہنا ہے کہ بلوچستان میں آج سے بارش برسانے والا مغربی سسٹم داخل ہونے کا امکان ہے اور 4 جنوری تک بلوچستان میں بارش اور برفباری کی پیشگوئی کی گئی ہے اور اس سسٹم کے گزرنے کے بعد کراچی میں ٹھنڈی ہوائیںچلنے کا امکان بھی ہے۔
محکمہ موسمیات کے مطابق شہر لاہور میں جمعرات سے بارش اور دھند کا امکان ہے، آزاد کشمیر میں برفباری کی پیشگوئی کی گئی ہے، جبکہ خیبر پختونخواہ اور پنجاب میں دھند اور اسموگ برقرار رہے گی اورتھرپارکر سندھ میں شدید سردی متوقع ہے۔
