ایبٹ آباد کے نجی اسپتال میں خاتون کے ہاں 7 بچوں کی پیدائش

ایبٹ آباد: صوبہ خیبر پختون خوا کے ضلع ایبٹ آباد کے ایک نجی اسپتال میں خاتون نے 7 بچوں کو جنم دیا ہے۔

سات جڑواں بچوں میں 4 لڑکے اور 3 لڑکیاں شامل ہیں جو مکمل طور پر صحت مند ہیں۔ خاتون رخسانہ کو قبل از وقت لیبر کے لیے جناح انٹرنیشنل اسپتال لایا گیا تھا۔ اسپتال انتظامیہ کا کہنا ہے کہ بچوں کی پیدائش 36 ہفتوں کے بجائے 32 ہفتوں میں ہوئی ہے۔

34 سالہ رخسانہ اور ان کے شوہر یار محمد 7 بچوں کی پیدائش سے پہلے ہی دو بیٹیوں کے والدین ہیں۔ بٹگرام سے تعلق رکھنا والا جوڑا خیبر پختونخوا کے ہزارہ ڈویژن کے ضلع ایبٹ آباد میں رہائش پذیر ہے۔

یہ بھی پڑھیں

صوبائی وزیر صحت تیمور جھگڑا نے نومولود بچوں کی تصویر شیئر کرتے ہوئے بتایا کہ ایبٹ آباد کے نجی ہسپتال میں ایک خاتون نے سات بچوں کو جنم دیا ہے۔ خاتون کا علاج صحت انصاف کارڈ پر کیا گیا ہے۔

6 of the septuplets (7 babies) born to a proud mother and father in Abbottabad, courtesy of #KPSehatCardPlus.
Wishing you all a wonderful life! pic.twitter.com/NLzzaSQCEy

— Taimur Saleem Khan Jhagra (@Jhagra) October 16, 2021

2014 میں ہونے والی ایک تحقیق میں دعویٰ کیا گیا تھا کہ پاکستان میں 1000 کیسز میں سے 10 کیسز میں جڑواں بچے پیدا ہوتے ہیں۔ 2016 میں خیبرپختون خوا میں ایک ہزار سے زیادہ جڑواں بچے پیدا ہوئے۔

ستمبر 2019 میں صوبہ پنجاب کے ضلع سرگودھا میں غزالہ نامی خاتون نے 6 بچوں کو جنم دیا تھا۔ نجی اسپتال میں پیدا ہونے والے بچوں میں 4 لڑکے اور 2 لڑکیاں تھیں۔

رواں سال جون میں پنجاب کے ضلع تلہ گنگ سے تعلق رکھنے والی آمنہ خاتون نے راولپنڈی کے ایک نجی اسپتال میں 4 بچوں کو ایک ساتھ جنم دیا تھا۔