متحدہ عرب امارات نے جمعہ کو افغانستان میں حالیہ زلزلے سے متاثرہ خاندانوں کے لیے 38 ٹن طبی امداد اور خوراک کا سامان بھیجا ہے۔

سرکاری خبر رساں ایجنسی “وام” نے جمعہ کی شام کو رپورٹ کیا کہ “یہ قدرتی آفات سے متاثرہ ممالک کو فوری امداد فراہم کرنے اور خواتین، بچوں اور معمر افراد جیسے کمزور گروہوں کے لیے انسانی امداد کو بڑھانے کی متحدہ عرب امارات کی پائیدار کوششوں کا حصہ ہے۔”

یہ بھی پڑھیں:

گذشتہ ہفتے افغانستان اور پاکستان میں 6.5 شدت کے زلزلے کے نتیجے میں کم از کم 13 افراد ہلاک اور 90 سے زائد زخمی ہوئے تھے۔

امریکی جیولوجیکل سروے نے کہا کہ زلزلے کا مرکز ہندوکش کے پہاڑوں میں تھا، جو نسبتا کم آبادی والے شمال مشرقی افغان صوبے بدخشاں میں، جرم گاؤں سے 40 کلومیٹر (25 میل) جنوب مشرق میں، 187 کلومیٹر (116 میل) کی کافی گہرائی میں تھا۔

یورپی-میڈیٹیرینین سیسمولوجیکل سینٹر کے مطابق، زلزلے کو پاکستان، بھارت، ازبکستان، تاجکستان، قازقستان، کرغزستان، افغانستان اور ترکمانستان کے تقریباً 285 ملین لوگوں نے 1,000 کلومیٹر (621 میل) سے زیادہ چوڑے علاقے میں محسوس کیا۔

“وام” کے مطابق گزشتہ سال جون میں یو اے ای نے جنوب مشرقی افغانستان میں خوست میں آنے والے ایک اور زلزلے کے بعد، 75 بستروں کے ساتھ 1,000 مربع میٹر کا فیلڈ ہسپتال بنایا تھا جو روزانہ 200 مریضوں کا علاج کر سکتا ہے۔

2021 سے 2022 تک، متحدہ عرب امارات نے کل 28 امدادی طیارے بھیجے جن میں 623 ٹن طبی اور خوراک کا سامان تھا۔

اس امداد سے 850,000 خواتین اور بچوں سمیت تقریباً 1.1 ملین افراد مستفید ہوئے۔