وزیر اعظم شہباز شریف نے وفاقی کابینہ کا اجلاس آج طلب کر لیا

اسلام آباد: وزیر اعظم شہباز شریف نے وفاقی کابینہ کا اجلاس آج طلب کر لیا ہے جس میں ملک کی سیاسی و معاشی صورتحال کا جائزہ لیا جائے گا۔

تفصیلات کے مطابق وزیر اعظم شہباز شریف نے آج وفاقی کابینہ کا اجلاس طلب کیا ہے جس میں ملک کی سیاسی و معاشی صورتحال پر اہم فیصلے متوقع ہیں۔ اس دوران پنجاب کی سیاسی صورتحال اور مستقبل کی حکمتِ عملی بھی زیرِ غور آئے گی۔

یہ بھی پڑھیں:

مختلف شہروں میں بارش، پانی گھروں میں داخل

وزیر اعظم شہباز شریف کی زیرِ صدارت وفاقی کابینہ اجلاس میں پنجاب کے 14 اضلاع میں ضمنی انتخابات کے نتائج اور وفاقی کابینہ کے مستقبل پر بھی گفت و شنید ہوگی جبکہ انتخابات کے بعد پنجاب کے ساتھ ساتھ وفاق میں بھی حکومت کی پوزیشن پر فرق پڑا ہے۔ 

واضح رہے کہ پنجاب کے ضمنی انتخابات کے دوران کل 20حلقوں میں سے 15 میں پی ٹی آئی نے کلین سویپ کیا جبکہ حکمراں سیاسی جماعت مسلم لیگ (ن) محض 4 نشستوں پر کامیاب ہوئی جس پر اتحادی جماعتوں میں تشویش پائی جاتی ہے۔ 

سابق وزیرِداخلہ شیخ رشید احمد کا کہنا ہے کہ شہباز شریف صرف اسلام آباد کے ہی وزیر اعظم رہ گئے ہیں۔ اپنے حالیہ بیان میں اسپیکر پنجاب اسمبلی چوہدری پرویز الٰہی کا کہنا تھا کہ عمران خان جب کہیں گے ، پنجاب اسمبلی توڑ دوں گا۔