گوگل نیوز پر ہمیں فالو کریںپاکستان سپر لیگ 9 کے دوران مقبوضہ فلسطین کے حق میں نعروں اور بینرز پر پابندی عائد کردی گئی ہے۔ سکیورٹی اہلکاروں نے لاہور قلندرز اور کوئٹہ گلیڈی ایٹرز کا میچ دیکھنے آنے والی خاتون کو گیٹ پر روک دیا۔
سکیورٹی اہلکاروں نے فلسطین کے حق میں بینرز اٹھانے پر فریال نامی خاتون کو روکا جبکہ بینرز پر فلسطین کے حق میں نعرے درج تھے۔ خاتون نے سوشل میڈیا پر غم و غصے کا اظہار کرتے ہوئے کہا کہ مجھے اس طرح روکا گیا جیسے میں ساتھ ہتھیار لائی ہوں۔
میڈیا کا کہنا ہے کہ سکیورٹی اہلکاروں نے خاتون کو سمجھایا کہ بینرز اندر لے جانے کی اجازت نہیں کیونکہ یہ سیاسی و متنازعہ پیغام ہے ، کچھ لوگ برا مانتے ہیں۔ اگر اندر جانا ہے تو یہ بینرز باہر چھوڑ دیں۔ فریال کا کہنا ہے کہ سکیورٹی گارڈز کا رویہ نامناسب تھا۔
متاثرہ خاتون فریال نے کہا کہ سکیورٹی گارڈز کے رویے سے میرے چھوٹے بہن بھائی خوفزدہ ہو گئے جو میرے ساتھ آئے تھے۔ میں نے بحث کرنا مناسب نہیں سمجھا۔ سکیورٹی گارڈز سے جو کہا گیا تھا، انہوں نے وہی کیا اور یہی ان کا کام بھی ہے۔
فریال کا کہنا ہے کہ پی ایس ایل کی ٹکٹس کے پیچھے جو شرائط لکھی ہیں، ان میں ایسے پوسٹرز، بینرز یا پلے کارڈز پر پابندی عائد کی گئی ہے جو مذہبی، سیاسی یا نسلی امتیاز پر مبنی ہوں۔ ایسے بینرز میچ میں لے جانا سختی سے منع کردیا گیا ہے۔
