گوگل نیوز پر ہمیں فالو کریںحیدرآباد: سندھ کے معروف شاعر اور ادیب ڈاکٹر آکاش انصاری حیدرآباد میں اپنے گھر میں آتشزدگی کے باعث جاں بحق ہو گئے جبکہ ان کا بیٹا شدید زخمی ہو گیا، جو انہیں بچانے کی کوشش کر رہا تھا۔
یہ افسوسناک واقعہ ہفتہ کے روز الیکٹرک شارٹ سرکٹ کے باعث پیش آیا جس کے نتیجے میں گھر میں زبردست آگ بھڑک اٹھی۔
واقعے کی اطلاع ملتے ہی ریسکیو ٹیم فوری طور پر سٹیزن کالونی میں واقع شاعر کے گھر پہنچی اور آگ پر قابو پا لیا۔
ڈاکٹر آکاش انصاری اپنے بیٹے کے ساتھ اسی گھر میں مقیم تھے۔ بعد ازاں ریسکیو ٹیم نے شاعر کی لاش کو مقامی اسپتال کے مردہ خانے منتقل کر دیا جبکہ ان کے بیٹے کا علاج جاری ہے۔
سندھ کے وزیر برائے ثقافت و سیاحت، سید ذوالفقار علی شاہ نے ڈاکٹر آکاش انصاری کے انتقال پر گہرے رنج و غم کا اظہار کیا۔ اپنے تعزیتی پیغام میں انہوں نے مرحوم کی شاعری اور ادب کے فروغ کے لیے خدمات کو سراہا۔
وزیر ثقافت نے پولیس حکام کو ہدایت دی کہ اس واقعے کی ہر پہلو سے جامع تحقیقات کی جائیں تاکہ کسی بھی ممکنہ پہلو کو نظرانداز نہ کیا جائے۔انہوں نے دعا کی کہ اللہ تعالیٰ مرحوم کی مغفرت فرمائے اور ان کے اہلِ خانہ کو صبر و حوصلہ عطا کرے۔
