گوگل نیوز پر ہمیں فالو کریںمعروف اداکارہ و گلوکارہ حرا مانی نے سوشل میڈیا پر اپنے مداحوں کے لیے ایک پراثر اور جذباتی پیغام جاری کیا ہے جس میں انہوں نے کہا ہے کہ اچھے کپڑے پہننے یا گاڑی خریدنے سے زندگی نہیں بدلتی ۔ ان کا کہنا ہے کہ اصل خوشی چھوٹی چھوٹی باتوں میں ہے اور انسان کو اپنی اصل فطرت کے ساتھ جینا سیکھنا چاہیے۔
حرا مانی نے حالیہ دنوں میں انسٹاگرام پر اپنی چند تصاویر شیئر کیں جن کے ساتھ انہوں نے اپنے تجربات اور احساسات کو الفاظ میں ڈھالا۔
انہوں نے لکھا کہ جب زندگی میں سب کچھ تھا، اچھے کپڑے، گاڑی، شہرت تب بھی انہیں یہ احساس ہوا کہ زندگی کی حقیقی خوبصورتی ان چیزوں میں نہیں بلکہ اندرونی سکون اور سادہ خوشیوں میں ہے۔
انہوں نے مداحوں کو مخاطب کرتے ہوئے مزید لکھا کہ اپنے اندر کے بچے کو مت مارو، جو چھوٹی چھوٹی خوشیوں سے خوش ہو جاتا ہے۔ زندگی کو بھرپور انداز میں جیو۔
حرا مانی کی یہ بات نہ صرف ایک فنی شخصیت کا تجربہ ہے بلکہ آج کے مادی دور میں ایک گہری سچائی کی طرف اشارہ بھی کرتی ہے، جہاں لوگ اکثر ظاہری چیزوں کو کامیابی اور خوشی کا پیمانہ سمجھ بیٹھتے ہیں۔
یہ بھی قابل ذکر ہے کہ حرا مانی نے ’دو بول‘، ’پریت نہ کریو کوئی‘، ’سن یارا‘ اور ’یقین کا سفر‘ جیسے مشہور ڈراموں میں اپنی اداکاری کے جوہر دکھا کر لاکھوں دل جیتے ہیں۔
گلوکاری کے میدان میں قدم رکھنے پر انہیں سوشل میڈیا پر سخت تنقید کا سامنا بھی کرنا پڑا مگر انہوں نے کبھی پیچھے مڑ کر نہیں دیکھا۔ وہ اپنی محنت اور لگن سے ثابت کر چکی ہیں کہ وہ صرف ایک اداکارہ نہیں بلکہ ایک باحوصلہ فنکارہ بھی ہیں۔
ان کا یہ پیغام آج کے نوجوانوں کے لیے ایک یاد دہانی ہے کہ اصل زندگی دکھاوے میں نہیں بلکہ ان لمحوں میں ہے جو دل کو سکون دیتے ہیں۔
