گوگل نیوز پر ہمیں فالو کریںکراچی میں گزشتہ دنوں پیش آنے والے ڈمپر اور موٹر سائیکل حادثے کے بعد لسانی کشیدگی کے خدشات اس وقت بڑھ گئے تھے جب ایک شخص کی ویڈیو سوشل میڈیا پر وائرل ہوئی، جس میں وہ مہاجروں کو زندہ جلانے اور سہراب گوٹھ بند کرنے کی دھمکیاں دے رہا تھا،اس بیان نے شہری حلقوں، سماجی کارکنوں اور سیاسی رہنماؤں میں شدید غم و غصہ پیدا کیا۔
متنازع ویڈیو مبینہ طور پر ڈمپرز ایسوسی ایشن کے صدر لیاقت محسود کے ٹک ٹاک اکاؤنٹ سے جاری کی گئی تھی۔ ویڈیو میں دھمکی آمیز جملوں نے سوشل میڈیا پر وسیع پیمانے پر بحث کو جنم دیا اور مختلف حلقوں کی جانب سے سخت مذمت کی گئی۔
مذکورہ شخص نے ایک وضاحتی ویڈیو جاری کرتے ہوئے اپنے الفاظ پر افسوس کا اظہار کیا اور کہا کہ یہ بیان جذبات میں دیا گیا تھاجبکہ مہاجر ہمارے بھائی ہیں۔
انہوں نے مہاجر برادری سے تہہ دل سے معافی مانگی اور امید ظاہر کی کہ کراچی کے عوام بڑے دل کا مظاہرہ کرتے ہوئے انہیں معاف کر دیں گے۔
سیاسی و سماجی حلقوں کا کہنا ہے کہ معافی سے معاملات میں کسی حد تک کشیدگی کم ہو سکتی ہے، تاہم ایسے بیانات دوبارہ نہ دینے کے لیے سنجیدہ اقدامات کی ضرورت ہے تاکہ شہر میں امن و بھائی چارہ قائم رہے۔
