گوگل نیوز پر ہمیں فالو کریںہالی ووڈ کی معروف اداکارہ ڈکوٹا جانسن نے اپنی زندگی کے سب سے بڑے خواب کے بارے میں کھل کر بات کی ہے۔
ایک انٹرویو میں اداکارہ نے کہا کہ ماں بننا ان کے لیے زندگی کی سب سے بڑی خواہش اور منزل ہے جس کا وہ شدت سے انتظار کر رہی ہیں۔
ڈکوٹا جانسن جنہوں نے عالمی شہرت حاصل کی فلم ففٹی شیڈز کی مشہور سیریز میں مرکزی کردار انستاشیا اسٹیل کے طور پر، اپنے فن اور شہرت کے باوجود اب اپنی ذاتی زندگی میں ایک نئے باب کی خواہش مند ہیں۔
اداکارہ نے دی ٹائمز سے گفتگو میں کہا کہ میرے نزدیک ماں بننا زندگی کی سب سے بڑی کامیابی ہے۔ یہ وہ چیز ہے جس کا میں ہمیشہ سے خواب دیکھتی آئی ہوں۔
36 سالہ ڈکوٹا نے مزید بتایا کہ انہیں یاد نہیں کہ زندگی کا کوئی وقت ایسا گزرا ہو جب وہ بچوں کی خواہش محسوس نہ کرتی ہوں، یہ جذبہ ہمیشہ ان کے دل میں موجود رہا۔
دلچسپ بات یہ ہے کہ اداکارہ نے حال ہی میں ایک انٹرویو میں یہ بھی انکشاف کیا کہ انہوں نے ایک مخصوص ڈیٹنگ ایپ رایا کا تجربہ کیا، مگر وہ ان کے لیے ناخوشگوار ثابت ہوا۔
ڈکوٹا کے مطابق ایپ پر موجود ہر شخص خود کو پہاڑوں کا شوقین، مہم جو اور کتوں سے محبت کرنے والا ظاہر کرتا ہے۔ سب ہی ایڈونچر کے دیوانے لگتے ہیں مگر میں ایسی نہیں ہوں۔ اگر مجھے کچھ کرنا ہو تو اپنے انداز سے کرتی ہوں، کسی شرط پر نہیں۔
ڈکوٹا جانسن کا کہنا تھا کہ وہ کسی شخص سے ملاقات کا قدرتی طریقہ زیادہ پسند کرتی ہیں، خاص طور پر اگر وہ کسی مشترکہ دوست کے ذریعے ہو کیونکہ اس طرح زیادہ امکان ہوتا ہے کہ سامنے والا شخص حقیقی اور سنجیدہ ہو۔
یاد رہے کہ ڈکوٹا جانسن کا تعلق انگریزی گلوکار کرس مارٹن سے رہا ہے۔ دونوں 2017 سے رشتے میں تھے اور آٹھ سال بعد جون 2025 میں ان کے درمیان علیحدگی ہوگئی۔ رپورٹس کے مطابق دونوں نے باہمی رضامندی سے راستے جدا کیے۔
اداکارہ اس وقت اپنے نئے منصوبے اے ٹری اِز بلو کے ذریعے بطور ہدایت کار اپنے کیریئر کا نیا سفر شروع کرنے جا رہی ہیں، جو ان کی پہلی ڈائریکشنل فلم ہوگی۔
