گوگل نیوز پر ہمیں فالو کریںپنجاب کے ضلع چکوال کے علاقے تلہ گنگ میں ایک افسوسناک روڈ حادثے میں مسافر بس گہری کھائی میں جا گری جس کے نتیجے میں 5 افراد جاں بحق جبکہ 7 خواتین سمیت 27 مسافر زخمی ہو گئے۔
حادثہ ڈھوک پٹھان کے قریب جی ٹی روڈ پر پیش آیا۔ ریسکیو حکام کے مطابق بس اسلام آباد سے کراچی جا رہی تھی کہ تیز موڑ پر ڈرائیور بس پر قابو نہ رکھ سکا اور گاڑی کھائی میں گر گئی۔
حادثے کی اطلاع ملتے ہی ریسکیو 1122 اور پولیس کی ٹیمیں موقع پر پہنچ گئیں اور امدادی کارروائیاں شروع کر دیں۔ جاں بحق افراد کی لاشیں اور زخمیوں کو قریبی اسپتالوں میں منتقل کر دیا گیا۔
ریسکیو ذرائع کا کہنا ہے کہ شدید دھند کی وجہ سے موٹر وے بند ہونے کے باعث بس جی ٹی روڈ سے سفر کر رہی تھی جو ممکنہ طور پر حادثے کی ایک وجہ بن سکتی ہے تاہم حادثے کی مکمل وجوہات کی تحقیقات جاری ہیں۔
یہ حادثہ روڈ سیفٹی کے مسائل کو ایک بار پھر اجاگر کرتا ہے جہاں تیز رفتاری، خراب سڑکیں اور موسم کی خرابی اکثر جان لیوا ثابت ہوتی ہیں۔ متاثرہ خاندانوں سے اظہار تعزیت کیا جا رہا ہے۔
