گوگل نیوز پر ہمیں فالو کریںڈیرہ اسماعیل خان کے علاقے درابن کلاں میں جمعہ اور ہفتہ کی درمیانی رات دہشت گردوں کی جانب سے تھانہ درابن پر حملہ کیا گیا تاہم سکیورٹی فورسز نے بروقت اور موثر کارروائی کرتے ہوئے اس حملے کو ناکام بنا دیا۔
ذرائع کے مطابق یہ حملہ ایک منظم منصوبہ بندی کے تحت کیا گیا تھا جس میں بھاری ہتھیاروں اور دھماکہ خیز مواد کا استعمال کیا گیا۔ حملے کے نتیجے میں تھانے کی بیرونی دیوار کو نقصان پہنچا جبکہ قریبی عوامی املاک بھی متاثر ہوئیں۔ اس کے باوجود سکیورٹی اہلکاروں کی فوری جوابی کارروائی کے باعث کسی قسم کا جانی نقصان رپورٹ نہیں ہوا۔
🚨🚨
ڈی آئی خان: درابن کلاں میں پولیس سٹیشن پر دہشتگردوں نے راکٹ حملہ کیا جس کے نتیجے میں تھانے کی عمارت کو نقصان پہنچا، جبکہ قریبی دکانیں بھی شدید متاثر ہوئیں
تاہم، حملے میں کوئی جانی نقصان نہیں ہوا pic.twitter.com/kEU8826l6g— The Khyber Chronicles (@TKCkhyber) April 25, 2026
دھماکوں کی شدت سے قریبی لاری اڈہ بھی متاثر ہوا، جہاں متعدد دکانیں مکمل طور پر تباہ ہو گئیں۔ متاثرہ دکانداروں کے مطابق انہیں لاکھوں روپے مالیت کا نقصان ہوا ہے جس کے باعث کئی خاندان شدید مالی مشکلات کا شکار ہو گئے ہیں۔
واقعے کے بعد علاقے میں سکیورٹی مزید سخت کر دی گئی ہے اور تحقیقات کا آغاز کر دیا گیا ہے۔حکام صورتحال کا باریک بینی سے جائزہ لے رہے ہیں جبکہ متاثرہ افراد کیلئے امدادی اقدامات پر بھی غور کیا جا رہا ہے۔
