وزیراعظم کل کراچی میں پہلے بس منصوبے کا افتتاح، سرکلر ریلوے کا سنگ بنیاد رکھیں گے

کراچی: وزیراعظم عمران خان کل ایک روزہ دورے پر کراچی پہنچیں گے اورکراچی کے پہلے جدید بس منصوبے کا افتتاح اورجدید کراچی سرکلرریلوے کا سنگ بنیاد رکھیں گے۔

پاکستان ریلوے ذرائع کے مطابق پاکستان ریلوے نے کراچی سرکلرریلوے کے جدید منصوبے کا سنگ بنیاد رکھنے کے لیے تقریب منعقد کرنے سے متعلق کراچی کینٹ اسٹیشن پرپینا فلیکس لگانے کے علاوہ دیگرانتظامات مکمل کرلیے ہیں۔

ریلوے حکام کے مطابق کراچی میں جدید سرکلر ریلوے بجلی سے چلنے والی تیز ٹرین ہوگی،یہ منصوبہ ڈھائی سو ارب روپے کی کثیر لاگت سے مکمل کیا جائے گا۔منصوبے کے پہلے مرحلے میں انفراسٹرکچر مکمل کیا جائے گا۔

دوسرے مرحلے میں آپریشنز بحال کیے جائیں گے، اس عظیم منصوبے کو تین سال کی مدت میں مکمل کیا جائے گا۔

ریلوے ذرائع کے مطابق کراچی سرکلر ریلوے کے لئے بغیر پھاٹک نیا ٹریک بچھایا جائے گا، ہر 6 منٹ بعد ٹرین اسٹیشن پر آئے گی منصوبے سے یومیہ تین سے پانچ لاکھ مسافروں کے مستفید ہونے کا امکان ہے۔

مزید پڑھیں:کراچی پولیس نے جرائم کے حوالے سے ہفتہ وار رپورٹ جاری کردی، 1154 ملزمان گرفتار

ریلوے ذرائع نے بتایاکہ منصوبہ نجی شعبے کے اشتراک سے مکمل کیا جائے گا، حکومت اراضی دے گی سرمایہ کاری نجی شعبہ کرے گا۔

ذرائع کے مطابق وزیراعظم عمران خان گورنر ہاؤس میں اعلیٰ سطح کے اجلاس کی صدارت کریں گے، اجلاس میں گورنرسندھ عمران اسماعیل،وفاقی وزراء اسدعمر،علی حیدرزیدی،امین الحق اور سندھ اسمبلی میں اپوزیشن لیڈر حلیم عادل سمیت قومی وصوبائی اسمبلی کے ارکان شریک ہوں گے۔

ذررائع کے مطابق اجلاس میں وزیر اعظم کو وفاق کے کراچی میں منصوبوں کے حوالے بریفنگ دی جائے گی۔ ذرائع نے بتایا کہ وزیراعظم سے بزنس کمیونٹی سمیت مختلف شخصیات کی ملاقاتیں بھی متوقع ہیں۔