کراچی، بزرٹہ لائن چاندی چوک کے قریب 3منزلہ عمارت گر گئی

کراچی کے علاقے بزرٹہ لائن میں چاندی چوک کے قریب 3 منزلہ عمارت گر جانے کے باعث خوف و ہراس پھیل گیا ہے۔

تفصیلات کے مطابق کراچی کے علاقے صدر میں واقع بزرٹہ لائن چاندی چوک کے قریب 3 منزلہ عمارت زوردار دھماکے ساتھ زمیں بوس ہوگئی جس سے علاقہ مکینوں میں خوف پھیل گیا۔

یہ بھی پڑھیں:

 پی آئی بی میں 3 منزلہ عمارت گر گئی، 2 خواتین جاں بحق

عمارت گر جانے کے بعد ایدھی کے رضاکار جائے وقوعہ پر پہنچ گئے۔ کافی دیر تک اطراف کی گلیوں میں گری ہوئی عمارت کے ملبے سے اٹھنے والا گردو غبار اڑتا نظر آیا۔

ریسکیو ذرائع کے مطابق خوش قسمتی سے گر جانے والی عمارت میں کوئی رہائش پذیر نہیں تھا جبکہ عمارت کے زمیں بوس ہونے سے بھی کسی قسم کا کوئی جانی نقصان نہیں ہوا۔

 شہرِ قائد میں کسی بلند و بالا عمارت کے گرنے کا یہ کوئی پہلا واقعہ نہیں ہے جبکہ ناقص تعمیراتی میٹیریل کے باعث پہلے بھی کئی عمارتیں زمیں بوس ہوچکی ہیں۔

یاد رہے کہ اس سے قبل کراچی کے علاقے پی آئی بی کالونی میں 3 منزلہ عمارت گر جانے کے باعث 2 خواتین جاں بحق ہوگئیں جبکہ متعدد افراد ملبے تلے دب گئے۔

 پی آئی بی میں آج سے 2 ماہ قبل جھکی ہوئی عمارت قریبی بلڈنگ پر جاگرنے کے باعث 2 خواتین جان کی بازی ہار گئیں۔ ایک بچے سمیت 3 افراد زخمی بھی ہوئے۔