حکومتی پابندیوں کے سبب ملک کو گندم کی قلت کا سامنا کرنا پڑسکتا ہے، فلور ملز ایسوسی ایشن

لاہور: پاکستان فلورملز ایسوسی ایشن نے کہا ہے کہ حکومتی پابندیوں کے سبب ملک کو گندم کی قلت کا سامنا کرنا پڑسکتا ہے۔

تفصیلات کے مطابق پاکستان فلورملز ایسوسی ایشن نے کہا ہے کہ ملک میں نجی گندم کی نقل وحمل پر پابندی نہ لگائی جائے کیونکہ اِس سے گندم کا نیا بحران پیدا ہوسکتا ہے۔

گزشتہ روز صوبائی دارالحکومت میں پاکستان فلور ملز ایسوسی ایشن کا آل پاکستان اجلاس ہوا، جس میں چاروں صوبوں کے عہدے داروں نے شرکت کی۔ اجلاس کے بعد جاری اعلامیے میں حکومت سے مطالبہ کیا گیا کہ ملک بھر میں گندم اجرا کے سرکاری نرخ یکساں ہونے چاہئیں۔

یہ بھی پڑھیں:

مجھے عہدے پر رکھنا یا نہ رکھنا وزیراعظم کی صوابدید پر ہے۔مفتاح اسماعیل

اجلاس کے بعد جاری اعلامیے میں کہا گیا ہے کہ نجی سیکٹر میں گندم کے وافر ذخائر موجود ہیں، حکومت پکڑ دھکڑ کا سلسلہ بند کرے، حکومتی پابندیوں کی وجہ سے کم پیداواری صوبوں میں گندم کی قلت بڑھ رہی ہے، ملک بھر میں نجی گندم کی نقل و حمل پر کوئی پابندی نہ لگائی جائے۔

فلورملز ایسوسی ایشن کی جانب سے جو اعلامیہ پیش کیا گیا ہے اُس میں انہوں نے مزید کہا کہ گندم کی قلت کا خدشہ ہے، حکومت مؤثر امپورٹ پالیسی بنائے۔ دریں اثنا پاکستان فلور ملز ایسوسی ایشن نے آٹا کی قیمتوں میں اضافے کو حکومت کی ناقص منصوبہ بندی قرار دے دیا۔