مالیکیولر پروفائلنگ سے سرطان کی نئی ہائی رسک ذیلی قسم دریافت

طبی محققین نے مالیکیولر پروفائلنگ کی مدد سے سرطان کی نئی ہائی رسک ذیلی قسم دریافت کر لی ہے جس سے انسانی زندگی کو لاحق خدشات میں اضافہ ہوگیا۔

تفصیلات کے مطابق حال ہی میں کم و بیش تمام ہی بچوں کے جگر کے کینسر کو ایک خاص نام دے کر درجہ بندی کر لی گئی تھی، تاہم پیڈیاٹرک پتھالوجسٹس کا کہنا ہے کہ بعض جگر کے سرطان الگ قسم کی خوردبینی خصوصیات رکھتے ہیں۔

مذکورہ خصوصیات کے حامل سرطانی خلیات ہیپاٹو بلاسٹوما یا ہیپاٹو سیلولر کارسینوما نامی سرطان کی پہلے سے طے شدہ اقسام سے مطابقت نہیں رکھتے۔ ماہرین کا کہنا ہے کہ ایسے سرطان کے حامل مریضوں کو کیموتھراپی سے فائدہ نہیں ہوتا۔

ٹیکساس چلڈرن کینسر اینڈ ہیماٹولوجی سینٹر میں ایسوسی ایٹ پروفیسر ڈاکٹر پاول سمازین سمیت دیگر سائنسدانوں کی یہ تحقیق جرنل آف ہیپا ٹولوجی میں شائع ہوئی ہے جس میں بتایا گیا ہے کہ نئے سرطان کے خلیات کیمو تھراپی کے خلاف زیادہ مزاحمت کرتے ہیں۔

محققین کی ٹیم نے کیمو تھراپی کے خلاف سرطانی خلیات کے ردِ عمل کا گہرائی سے جائزہ لیا ہے۔ان کا کہنا ہے کہ اگر اس قسم کے سرطان کا زیادہ جارحانہ سرجری کے طریقوں سے علاج نہ کیا جائے تو سرطان بگڑ سکتا ہے اور ٹرانسپلانٹیشن بھی کرانی پڑ سکتی ہے۔