میڈیا رپورٹس کے مطابق سوشل میڈیا پر وائرل ہونے والی ایک ویڈیو میں دیکھا جا سکتا ہے کہ اکشے کمار گاڑی کی جانب جا رہے تھے کہ اسی دوران خاتون مداح نے مالی مدد کی اپیل کی۔ خاتون نے ہاتھ میں ایک سفید کاغذ پکڑتے ہوئے کہا، “پاپا بہت بڑے قرضے میں ہیں، پلیز ان کو اس سے نکال دیں۔” اداکار نے خاتون کی درخواست پر مثبت ردعمل دیا اور اسے اپنی ٹیم کے پاس بھیج دیا۔
یہی نہیں، بلکہ جب بھارتی تہذیب و ثقافت کے ایک اہم عنصر کا اظہار کرتے ہوئے خاتون نے ان کے پاؤں چھونے کی کوشش کی تو اکشے کمار نے اسے خاتون کی عزت و احترام کے خلاف سمجھتے ہوئے خود جھک کر انہیں ایسا کرنے سے روک دیا اور پھر اپنی گاڑی میں بیٹھ گئے۔
اکشے کمار کے اس حسنِ سلوک پر مداحوں نے سوشل میڈیا پر ان کی خوب تعریف کی اور کمنٹس میں مثبت ردعمل دیا۔ ایک صارف نے لکھا، “کتنے منکسر المزاج ہیں۔” ایک اور نے تبصرہ کیا، “اکشے سر سپر سپر سپر۔” ایک صارف کا کہنا تھا، “یہ لوگ عوام کی وجہ سے ہی سیلیبریٹی ہیں، اب واپس دینے کا وقت ہے اور انہیں دینے والا ہونا چاہیے۔”
اکشے کمار نے ووٹ ڈالنے کے بعد میڈیا سے بھی گفتگو کی اور ممبئی کے عوام سے اپیل کی کہ وہ اپنے “ریموٹ کنٹرول” یعنی ووٹ کا درست استعمال کریں۔ ان کا کہنا تھا، “آج وہ دن ہے جب ریموٹ کنٹرول ہمارے ہاتھ میں ہوتا ہے۔ میں تمام ممبئی والوں سے اپیل کرتا ہوں کہ وہ ووٹ دیں۔ اب ہماری باری ہے کہ ہم باہر نکلیں اور صحیح شخص کا انتخاب کریں۔ اگر آپ ممبئی کے حقیقی ہیرو بننا چاہتے ہیں تو ڈائیلاگ بولنے کے بجائے ووٹ ڈالنے آئیں۔”
واضح رہے کہ بھارتی ریاست مہاراشٹر کے 29 بلدیاتی اداروں میں پولنگ کا آغاز ہوچکا ہے ، جن میں بی ایم سی کے انتخابات بھی شامل ہیں۔ اس موقع پر سچن ٹنڈولکر، جان ابراہم، تمنا بھاٹیہ، نانا پاٹیکر اور گلزار سمیت کئی دیگر مشہور شخصیات نے بھی اپنا حقِ رائے دہی استعمال کیا۔
گوگل نیوز پر ہمیں فالو کریں
