گوگل نیوز پر ہمیں فالو کریںپاکستان تحریکِ انصاف کے بانی سابق وزیر اعظم عمران خان اور ان کی اہلیہ بشریٰ بی بی کے لیے اڈیالہ جیل میں ازدواجی تعلقات کی اجازت سے متعلق ایک درخواست اسلام آباد ہائی کورٹ میں جمع کروا دی گئی ہے۔
درخواست شاہد یعقوب نامی شہری کی جانب سے دائر کی گئی ہے جس میں مؤقف اختیار کیا گیا ہے کہ عمران خان اور بشریٰ بی بی باقاعدہ نکاح کے بندھن میں بندھے ہوئے ہیں اس لیے انہیں ازدواجی تعلقات قائم کرنے اور تنہائی میں ملاقات کا قانونی اور شرعی حق حاصل ہے جس سے انہیں محروم رکھا جا رہا ہے۔
معروف صحافی بلال غوری نے ٹوئٹ کیا جس میں انہوں نے بتایا کہ شاہد یعقوب نامی شہری نے اسلام آباد ہائی کورٹ میں ایک درخواست دائر کی ہے جس میں استدعا کی گئی ہے کہ اڈیالہ جیل انتظامیہ کو ہدایت دی جائے کہ دونوں کو ازدواجی ملاقات کے لیے سہولیات فراہم کرے۔
عمران خان اور ان کی اہلیہ بشری بی بی کو جیل میں ازدواجی تعلقات نباہنے کی اجازت دی جائے ،اسلام آباد ہائیکورٹ میں پٹیشن دائر
درخواست گذار شاہد یعقوب کے مطابق یہ ان دونوں کا قانونی حق ہے لہٰذا دونوں کو تنہائی میں ملاقات کی سہولت فراہم کی جائے— Bilal Ghauri (@mbilalghauri) September 18, 2025
یاد رہے کہ عمران خان اور ان کی اہلیہ بشریٰ بی بی اس وقت اڈیالہ جیل میں قید ہیں اور القادر ٹرسٹ کیس” میں 14 سال قید کی سزا کاٹ رہے ہیں۔
یہ کیس قومی احتساب بیورو (نیب) کی جانب سے دائر کیا گیا تھا جس میں الزام ہے کہ عمران خان نے اپنے دورِ حکومت میں برطانیہ سے ملنے والے 190 ملین پاؤنڈ (تقریباً 50 ارب روپے) کی رقم کو القادر ٹرسٹ کے ذریعے پراپرٹی ٹائیکون ملک ریاض کو فائدہ پہنچانے کے لیے استعمال کیا۔
