اے این ایف کی کارروائی، منشیات کی بھاری کھیپ اسمگل کرنیکی کوشش ناکام

اسلام آباد: انسدادِ منشیات فورس (اے این ایف) نے کارروائی کرتے ہوئے منشیات کی بھاری کھیپ غیر قانونی طور پر اسمگل کرنے کی کوشش ناکام بنادی ہے۔

تفصیلات کے مطابق منشیات فروش ملزمان کھیپ کو اسلام آباد اسمگل کرنا چاہتے تھے۔ اے این ایف نے دونوں ملزمان کو موٹر وے ٹول پلازہ اسلام آباد سے گرفتار کر لیا۔ 2 مشکوک گاڑیوں کی چیکنگ کے دوران 240 کلوگرام منشیات برآمد ہوئیں۔

یہ بھی پڑھیں

: اے این ایف کی کارروائی، 33کلوگرام منشیات برآمد، 2ملزمان گرفتار

اے این ایف کا کہنا ہے کہ مشکوک گاڑیوں ویگو ڈبل کیبن اور کار سے کم و بیش 240 کلو گرام منشیات برآمد ہوئیں جن میں سے 162 کلوگرام چرس جبکہ 78 کلوگرام افیون شامل ہے۔ کارروائی کے دوران نیک محمد اور سلمان خان نامی دو ملزمان گرفتار ہوئے۔

انسدادِ منشیات فورس (اے این ایف) نے دونوں ملزمان کے خلاف منشیات کے انسداد سے متعلق ایکٹ کے تحت کارروائی کرتے ہوئے مقدمات درج کر لیے۔ ملزمان سے مزید تفتیش جاری ہے  جس کے دوران مزید انکشافات متوقع ہیں۔ 

خیال رہے کہ اس سے قبل اینٹی نارکوٹکس فورس (انٹیلی جنس) اور اے این ایف پشاور نے مشترکہ کارروائی کرتے ہوئے 33 کلوگرام وزنی منشیات برآمد کیں جن کو اسمگل کرنے کے الزام میں 2 ملزمان کو گرفتار کر لیا گیا۔

 اے این ایف حکام نے گزشتہ ماہ پشاور موٹر وے برج، رنگ روڈ پر واقع بی ای پیٹرولیم کے قریب تلاشی کے دوران ایک کار سے 33 اعشاریہ 3 کلوگرام منشیات برآمد کیں جن میں 26 کلو ہیروئن، 6 کلو چرس اور 1.2 کلو گرام افیون شامل تھی۔