ملک میں شدید بارشوں کا ایک اور سلسلہ شروع ہونے کا امکان

محکمہ موسمیات کا کہنا ہے کہ خلیج بنگال سے ہواؤں کا نیا سلسلہ 2 سے 3 ستمبر کے دوران داخل ہوگا۔

محکمہ موسمیات کی نئی پیش گوئی کے مطابق مغربی لہر کا ایک الگ سلسلہ ملک کے مغربی حصوں پر اثر انداز ہوگا، خیبر پختونخوا میں 2 سے 3 ستمبر کے دوران بالائی علاقوں میں گرج چمک کے ساتھ بارش متوقع ہے جبکہ اسلام آباد اور وسطی و بالائی پنجاب نے مختلف علاقوں میں 2 سے 3 ستمبر کے دوران بارشوں کا امکان ہے۔

محکمہ موسمیات کا اپنے بیان میں کہنا ہے کہ 3 سے 4 ستمبر کے دوران جنوبی پنجاب میں شدید بارشوں کا امکان ہے جبکہ صوبہ بلوچستان میں 2 سے 4 ستمبر کے دوران شدید بارشوں کی پیش گوئی کی گئی ہے۔

اسی طرح صوبہ سندھ میں 3 سے 4 ستمبر کے دوران بارشوں کے نئے سلسلے کا امکان ہے جبکہ بارشوں کے باعث بالائی علاقوں میں لینڈ سلائیڈنگ اور ملک کے نشیبی علاقے زیر آب آنے کا خدشہ ہے۔