گوگل نیوز پر ہمیں فالو کریںکراچی کے جنوب میں بحیرۂ عرب میں بننے والا کم دباؤ کا نظام ایک ڈپریشن کی شکل اختیار کرچکا ہے جو اس وقت شہر سے تقریباً ایک ہزار چار کلومیٹر کے فاصلے پر جنوب مشرق میں واقع ہے۔
محکمہ موسمیات کے مطابق گزشتہ 24 گھنٹوں کے دوران یہ نظام شمال مغرب کی سمت میں پیش رفت کر رہا ہے۔
محکمۂ موسمیات نے ہفتہ کو جاری کردہ اپنے چوتھے الرٹ میں بتایا کہ یہ ڈپریشن بھارتی شہر ممبئی کے جنوب مغرب میں تقریباً 400 کلومیٹر کے فاصلے پر بحیرۂ عرب کے مشرقی اور مرکزی حصے میں موجود ہے۔
اگلے 24 گھنٹوں میں اس کے مزید شمال مغرب کی جانب بڑھنے کا امکان ظاہر کیا گیا ہے۔
کراچی میں قائم سائیکلون وارننگ سینٹر کے مطابق اس وقت پاکستان کے کسی بھی ساحلی علاقے کو اس موسمی نظام سے کوئی خطرہ نہیں ہے، تاہم ماہرین اس کے اثرات پر مسلسل نظر رکھے ہوئے ہیں۔
قبل ازیں جمعرات کے روز یہ علاقہ کم دباؤ کے زیر اثر تھا جو رفتہ رفتہ شدت اختیار کرتا ہوا ڈپریشن میں تبدیل ہوگیا۔
اس وقت اس کا مرکز 8.6 درجے شمالی عرض البلد اور 67.6 درجے مشرقی طول البلد پر تھا جو کراچی سے تقریباً 1800 کلومیٹر جنوب مشرق میں واقع تھا۔
گزشتہ مہینے اکتوبر میں بھی بحیرۂ عرب میں ایک کم دباؤ کا نظام ڈپریشن میں بدل گیا تھا جو کراچی سے 440 کلومیٹر کے فاصلے پر جنوب میں موجود تھا۔
اس کے باعث سندھ کے ساحلی علاقوں میں سمندری لہریں بلند ہوگئی تھیں اور موسم میں خاصی خرابی دیکھی گئی تھی۔
بعد ازاں وہ نظام مزید شدت اختیار کرتا ہوا ایک طاقتور سمندری طوفان شکتی کی صورت میں بحیرۂ عرب کے مغربی و شمال مغربی حصے کی جانب بڑھ گیا تھا۔
