گوگل نیوز پر ہمیں فالو کریںمیڈیکل اینڈ ڈینٹل کالج ایڈمیشن ٹیسٹ (ایم ڈی کیٹ) 2025 کل 26 اکتوبر کو ملک بھر میں منعقد کیا جائے گا۔
پاکستان میڈیکل اینڈ ڈینٹل کونسل (پی ایم ڈی سی) کے مطابق ملک کے مختلف حصوں سے 1,40,125 امیدوار امتحان میں حصہ لیں گے۔
متعلقہ جامعات نے ایم ڈی کیٹ امتحان 2025 کے تمام انتظامات مکمل کر لیے ہیں۔ امتحانی مراکز میں امیدواروں کے لیے تمام سہولیات فراہم کی جائیں گی۔
غیر مجاز الیکٹرانک آلات کے استعمال کو روکنے کے لیے جیمرز نصب کیے جائیں گے۔ امتحانی ہالز میں موسم کے لحاظ سے مناسب انتظامات کرنے کی ہدایت دی گئی ہے۔
والدین کے لیے علیحدہ انتظار گاہیں قائم کرنے کا بھی حکم دیا گیا ہے۔ جامعات امیدواروں کو کاربن کاپی والی ببل شیٹس فراہم کریں گی۔
سوالیہ پرچے صرف گواہوں کی موجودگی میں کھولے جائیں گے اور نتائج کے اعلان کے بعد پرچے 12 ماہ تک محفوظ رکھے جائیں گے۔
نتائج امتحان کے ایک ہفتے کے اندر جاری کرنے کی ہدایت دی گئی ہے، جبکہ نتائج کے 10 دن بعد ایک جامع تجزیاتی رپورٹ جمع کرانے کا حکم دیا گیا ہے۔
امتحان ختم ہوتے ہی سرکاری جوابات (Answer Keys) پی ایم ڈی سی کی سرکاری ویب سائٹ پر جاری کیے جائیں گے۔ نتائج کے اعلان کے بعد 3 دن کے اندر دوبارہ امتحان کی سہولت فراہم کی جائے گی۔
داخلوں کی ذمہ داری صوبائی حکام اور جامعات پر ہوگی اور تمام داخلے 28 فروری 2026 تک مکمل کرنے کی ہدایت دی گئی ہے۔
پاکستان میڈیکل اینڈ ڈینٹل کونسل کا داخلہ عمل میں کوئی کردار نہیں ہوگا، تاہم جامعات کو تمام ہدایات پر مکمل عمل درآمد یقینی بنانے کی تاکید کی گئی ہے۔
ایم ڈی کیٹ کے تمام مراحل شفافیت، ایمانداری اور رازداری کے ساتھ مکمل کیے جائیں گے۔
