ملک کو معاشی بحران سے نکالنے کیلئے آرمی چیف متحرک، امریکی ڈپٹی وزیرِ خارجہ کو فون کردیا

اسلام آباد: پاکستان کی مسلح افواج کے سربراہ جنرل قمر جاوید باجوہ اور امریکی ڈپٹی سیکریٹری کے درمیان ٹیلی فون پر رابطہ ہوا۔

تفصیلات کے مطابق غیر ملکی میڈیا کی رپورٹ میں اس بات کا دعویٰ کیا گیا ہے کہ پاکستان کی مسلح افواج کے سربراہ جنرل قمر جاوید باجوہ نے امریکی ڈپٹی سیکریٹری وینڈی شرمین سے ٹیلی فون پر رابطہ کرکے قرض کی رقم جلد جاری کرنے کیلئے آئی ایم ایف پر اثر و رسوخ استعمال کرنے کی اپیل کی ہے۔

غیر ملکی خبر رساں ادارے کے مطابق آرمی چیف جنرل قمر جاوید باجوہ نے بائیڈن انتظامیہ سے رابطے میں کہا کہ امریکا آئی ایم ایف پرایک ارب بیس کروڑ ڈالرز کی فوری فراہمی کے لیے دباؤ ڈالے۔

یہ بھی پڑھیں:

سعودی عرب اور پاکستان کے درمیان اچھے تعلقات ہیں، سعودی سفیر

رپورٹ میں آرمی چیف کے حوالے سے بتایا گیا ہے کہ انہوں نے وائٹ ہاؤس اور امریکی محکمہ خزانہ کو آئی ایم ایف پر پاکستان کے لیے تقریباً 1 ارب 20 کروڑ ڈالرز کی فوری فراہمی کے لیے دباؤ ڈالنے کی اپیل کی، جو پاکستان کو دوبارہ شروع کیے گئے قرض پروگرام کے تحت ملنے والے ہیں۔

واضح رہے کہ پاکستان وفاقی وزیرِ برائے خزانہ مفتاح اسماعیل نے 14 جولائی کو سماجی رابطے کی ویب سائٹ ٹوئٹر پر آئی ایم ایف کا اعلامیہ شیئر کیا تھا، جب کہ 2 روز قبل اسلام آباد میں کارپوریٹ گورننس سیمینار سے خطاب میں وزیرِ خزانہ مفتاح اسماعیل نے بتایا تھا کہ آئی ایم ایف سے معاملات اگست کے شروع میں حل ہو جائیں گے۔

ان کا کہنا تھا کہ آئی ایم ایف نے اینٹی کرپشن قوانین پر عمل درآمد کی ہدایت کی ہے، اینٹی کرپشن قوانین اگرچہ آئی آیم ایف کا ترجیحی ایکشن نہیں ہے۔ وزیرِ خزانہ مفتاح اسماعیل نے یہ بھی کہا تھا کہ ہم ڈیفالٹ سے بچ چکے ہیں لیکن ابھی بھی چوکنا رہنا ہو گا۔

یاد رہے کہ تمام چیمبرز اور عوام میں معیشت کے حوالے سے تشویش تھی، اگرآئی ایم ایف پیکج جلدی مل جاتا ہے تو ڈالر کی قیمت میں کمی کا امکان ہے، اس سے پاکستان کو چین اور سعودی عرب سے امداد میں بھی ملے گی۔