گوگل نیوز پر ہمیں فالو کریںبرطانیہ: پاکستان شاہینز نے اذان اویس کی شاندار ناقابل شکست 94 رنز کی اننگز کی بدولت تین روزہ میچ کے پہلے دن کے اختتام تک 185 رنز پر چار وکٹوں کے نقصان پر اننگز مکمل کی۔ یہ میچ پروفیشنل کاؤنٹی کلب سیلیکٹ الیون کے خلاف فرسٹ سینٹرل کاؤنٹی گراؤنڈ، ہوو میں کھیلا جا رہا ہے۔
بارش کے باعث پہلے دن صرف 55اعشاریہ 2 اوورز کا کھیل ممکن ہو سکا جبکہ آخری سیشن میں صرف 14 گیندیں ہی کروائی جا سکیں جس کے بعد امپائرز نے کھیل ختم کرنے کا اعلان کیا۔
بائیں ہاتھ کے بلے باز اذان اویس جو حالیہ ون ڈے سیریز میں بھی نمایاں کارکردگی دکھا چکے ہیں، ایک بار پھر ٹیم کی بیٹنگ لائن کے مرکزی ستون ثابت ہوئے۔ ان کی 159 گیندوں پر مشتمل اننگز میں 14 دلکش چوکے اور ایک شاندار چھکا شامل تھا۔ وہ وکٹ پر پوری مضبوطی سے ڈٹے ہوئے ہیں۔
اذان کے ہمراہ وکٹ پر وکٹ کیپر بلے باز روحیل نذیر سات رنز بنا کر ناٹ آؤٹ ہیں، جنہوں نے 14 گیندوں پر ایک چوکا لگایا۔
قبل ازیں ٹاس جیت کر پہلے بیٹنگ کا فیصلہ کرتے ہوئے پاکستان شاہینز نے سمیع الحسین اور اذان اویس کی اوپننگ جوڑی کے ذریعے 78 رنز کا مستحکم آغاز فراہم کیا۔
سمیع الحسین نے 85 گیندوں پر 42 رنز بنائے جس میں آٹھ چوکے اور ایک چھکا شامل تھا۔ یہ دونوں بلے باز اس سے قبل اتوار کو ون ڈے سیریز کے تیسرے میچ میں بھی 101 رنز کی اوپننگ شراکت قائم کر چکے ہیں۔
سمیع کے آؤٹ ہونے کے بعد محمد سلیمان سات رنز بنا کر پویلین لوٹ گئے۔ ٹیم کے کپتان سعود شکیل، جو 15 رنز پر کھیل رہے تھے، نیتھن گلکرسٹ کی گیند ہاتھ پر لگنے کے باعث زخمی ہو کر ریٹائرڈ ہرٹ ہو گئے۔
ون ڈے سیریز میں دو نصف سنچریاں اسکور کرنے والے دائیں ہاتھ کے بلے باز حیدر علی اس بار کھاتہ کھولے بغیر آؤٹ ہو گئے جبکہ مبصر خان نے 13 گیندوں پر دو چوکوں کی مدد سے 17 رنز بنائے اور چائے کے وقفے سے کچھ دیر قبل آؤٹ ہو گئے۔
پروفیشنل کاؤنٹی کلب کی جانب سے نیتھن گلکرسٹ سب سے کامیاب باؤلر رہے، جنہوں نے 15 اوورز میں 43 رنز دے کر دو کھلاڑیوں کو آؤٹ کیا۔
