میں نے پیار کیا کی اداکارہ بھاگیشری سلمان خان کے ساتھ اداکاری کیلئے پر عزم

نئی دہلی: 1989 کی بالی ووڈ فلم میں نے پیار کیا میں ہیروئن کے طور پر جلوہ گر ہونے والی بھارتی اداکارہ بھاگیشری نے کہا ہے کہ میں کسی بھی نئے پراجیکٹ کیلئے سلمان خان کے ساتھ اداکاری کیلئے پر عزم ہوں۔

تفصیلات کے مطابق اداکارہ بھاگیشری نے ایک انٹرویو کے دوران گفتگو کرتے ہوئے کہا کہ اگر مجھے دوبارہ سلمان خان کے ہمراہ اداکاری کا موقع ملا تو ضرور کروں گی جبکہ فلم انڈسٹری کو چھوڑنا کوئی آسان فیصلہ نہیں تھا، تاہم مجھے یہ کرنا پڑا۔

یہ بھی پڑھیں:

مجھ سے شادی کروگی؟ سلمان خان کی فلم کو 17 سال مکمل 

سلمان خان کی مہمان نوازی نے میرا دل جیت لیا۔ارجمند رحیم

دبنگ سیریز کا کارٹون ورژن تیار، چلبل پانڈے کا استقبال کریں۔سلمان خان

گفتگو کے دوران 52 سالہ اداکارہ بھاگیشری نے کہا کہ مجھے بالی ووڈ چھوڑنے کے فیصلے پر کوئی پچھتاوا نہیں کیونکہ میں نے شادی شدہ زندگی گزارنے کو فلم انڈسٹری پر ترجیح دی جبکہ ماضی میں ایک اداکارہ کے طور پر زندگی بسر کرنا کافی مشکل تھا۔

رواں برس تھلائیوی میں اداکاری کے جوہر دکھانے والی بھاگیشری نے کہا کہ میری قسمت بہت اچھی ہے کہ مجھے اپنے شوہر کو دنیا سے پوشیدہ نہیں رکھنا پڑا۔ میری شادی دیر سے نہیں ہوئی۔ میرے 2 بہت خوبصورت بچے ہیں جو آج کل اپنے کیرئیر پر توجہ دے رہے ہیں۔

اپنے بچوں کا ذکر کرتے ہوئے اداکارہ بھاگیشری نے کہا کہ میرے بچے اداکاری کے میدان میں کام کیلئے میری حوصلہ افزائی کرتے ہیں۔ اگر کوئی اداکارہ اپنے خاندان یا معاشرے یا پھر کیرئیر میں ناکام ہوجائے تو ماضی میں اسے حقیر سمجھا جاتا تھا۔

سلمان خان کے متعلق بھاگیشری کا کہنا تھا کہ مجھے بہت خوشی ہوگی اگر ان کے ساتھ اداکاری کا موقع ملے لیکن یہ اس بات پر منحصر ہے کہ کوئی پروڈیوسر یا ڈائریکٹر ہم دونوں کیلئے ایسے کردار لے کر آئے جو ہم دونوں ایک ساتھ کرنا پسند کریں۔