بھارتی یومِ جمہوریہ، مقبوضہ وادی میں ہڑتال، کشمیری یومِ سیاہ آج منارہے ہیں

نئی دہلی / سری نگر: بھارتی قوم آج یومِ جمہوریہ جبکہ مظلوم کشمیری یومِ سیاہ منا رہے ہیں، اس موقعے پر مقبوضہ وادی میں مکمل ہڑتال کی گئی ہے۔

تفصیلات کے مطابق ہر سال 26 جنوری کے روز بھارتی قوم 1950 کا وہ سال یاد کرتی ہے جب گورنمنٹ آف انڈیا ایکٹ 1935 کی جگہ بھارت کا اپنا آئین نافذ کیا گیا تاہم مظلوم کشمیریوں پر قابض بھارتی فوج کا ظلم و جبر اس روز بھی ختم نہ ہوسکا۔ 

یہ بھی پڑھیں:

بھارت نے 10 سال میں 1 لاکھ سے زائد کشمیریوں کو شہید کیا۔پاکستان

بھارتی قوم کو 1950 میں اپنا آئین تو مل گیا جسے آج 72 سال مکمل ہو گئے ہیں، تاہم 7 دہائیاں گزر جانے کے باوجود مظلوم کشمیریوں کا وطن آزاد نہ ہوسکا۔ کشمیر بنے گا پاکستان کے نعرے آج مقبوضہ وادی کی گلی گلی میں گونجیں گے۔

بھارتی یومِ جمہوریہ کے موقعے پر آج مظلوم کشمیری پاکستان اور بھارت سمیت دنیا بھر میں یومِ سیاہ منائیں گے۔ حریت رہنماؤں کی جانب سے ہڑتال کی کال پر مقبوضہ وادی میں شٹر ڈاؤن ہڑتال کی جارہی ہے۔ گلیاں اور سڑکیں ویران ہوگئیں۔

غاصب بھارتی فوج نے مقبوضہ جموں و کشمیر کو فوجی چھاؤنی میں تبدیل کردیا۔ آج یومِ سیاہ کے موقعے پر پاکستان، آزاد کشمیر اور دنیا بھر میں بھارت کے ظلم و جبر اور بنیادی انسانی حقوق کی سنگین خلاف ورزیوں کے خلاف احتجاجی ریلیاں نکالی جائینگی۔