کراچی میں بارش کے دوران کرنٹ لگنے کے واقعات، 6افراد جاں بحق

شہرِ قائد میں بارش کے دوران کرنٹ لگنے کے مختلف واقعات میں گزشتہ 24 گھنٹوں کے دوران 6 افراد جاں بحق ہو گئے ہیں۔

تفصیلات کے مطابق کراچی میں مون سون کا تیسرا اور طاقتور اسپیل جاری ہے جس کے دوران گزشتہ روز سے اب تک 6 افراد جان کی بازی ہار گئے جن میں ایک مزدور اور دو نوجوان بھی شامل ہیں۔

یہ بھی پڑھیں:

دعا زہرا چائلڈ پروٹیکشن بیورو میں منتقل

حبیب بینک چورنگی، سائٹ ایریا کے قریب نجی کمپنی میں پیشہ ورانہ فرائض کی انجام دہی کے دوران کرنٹ لگنے سے ایک مزدور جاں بحق ہوا جبکہ لیاری کی نعمان مسجد کے نزدیک بھی بجلی کے پول سے کرنٹ لگنے کے باعث ایک شخص چل بسا۔

لیاقت آباد 5 نمبر کے علاقے میں 17 سالہ نوجوان گھر کے باہر ہی کرنٹ لگنے کے باعث جاں بحق ہوا جبکہ تیسر ٹاؤن سیکٹر 35 سی میں 21سالہ وقار کرنٹ لگنے کے باعث جان کی بازی ہار گیا۔

تیسر ٹاؤن، سرجانی میں کرنٹ لگنے کے باعث 30 سالہ شخص جاں بحق ہوگیا۔ گھر میں کام کے دوران لی مارکیٹ کے نزدیک بھی کرنٹ لگنے کے باعث 40سالہ شان حسین جاں بحق ہوگئے۔

اسپیکر سندھ اسمبلی و قائم مقام گورنر آغا سراج درانی کا کہنا ہے کہ بارشوں کے دوران قیمتی انسانی جانوں کے ضیاع پر افسوس ہے۔واضح رہے کہ محکمۂ موسمیات نے 26 جولائی تک بارشوں کی پیشگوئی کی ہے۔