یورپی یونین کا تمام فونزکیلئے ایک ہی چارجر پر اتفاق

برسلز: یورپی یونین نے امریکی ٹیکنالوجی کمپنی ایپل کے اسمارٹ فونز کیلئے ایک ہی چارجر پر اتفاق کرلیا ہے۔

غیر ملکی خبر رساں ادارے کی ایک رپورٹ کے مطابق یورپی یونین نے اتفاق کرلیا ہے کہ امریکی ٹیکنالوجی کمپنی ایپل کو 2024 تک یورپ میں فروخت ہونے والے آئی فونز کے کنیکٹر کو تبدیل کرنا پڑے گا۔

مذکورہ فیصلے کے حوالے سے یورپی یونین کا کہنا ہے کہ اس فیصلے سے صارفین کیلئے آسانیاں پیدا ہونگی اور اُن کے پیسوں کی بچت ہوگی۔

واضح رہے کہ صارفین کی جانب سے شکایات سامنے آنے کے بعد یورپ ایک دہائی سے زیادہ عرصے سے ایک ہی موبائل چارجنگ پورٹ متعارف کرانے کے لیے کوشش کر رہا تھا، آئی فون اور اینڈرائیڈ صارفین کو شکایات تھیں کہ انہیں اپنی ڈیوائسز چارج کرنے کے لیے مختلف چارجرز استعمال کرنے کے باعث مشکلات کا سامنا ہے۔

یہ بھی پڑھیں: ایلون مسک ٹوئٹر انتظامیہ پر برہم، ڈیل منسوخ کرنے کی دھمکی دیدی

آئی فون کے اسمارٹ فونز کو ایک لائٹنگ کیبل کے ذریعے چارج کیا جاتا ہے جبکہ اینڈرائیڈ ڈیوائسز کو چارج کرنے کے لیے یو ایس بی کنیکٹر استعمال کیے جاتے ہیں۔

یورپی پارلیمنٹ کی جانب سے ایک بیان میں کہا گیا ہے کہ 2024 کے موسم خزاں تک یو ایس بی ٹائپ کنیکٹر یورپی یونین میں استعمال ہونے والے تمام موبائل فون، ٹیبلٹ اور کیمروں کے لیے مشترکہ چارجنگ پورٹ بن جائے گا۔

ایپل نے خبردار کیا تھا کہ اس تجویز سے جدت اور اختراع کو نقصان ہوگا اور فیصلے کے باعث الیکٹرانک ویسٹ کا پہاڑ کھڑا ہوجائے گا، تاہم، کمپنی نے فوری طور پر اس پیش رفت پر کوئی رد عمل دینے کی درخواست کا جواب نہیں دیا۔