گوگل نیوز پر ہمیں فالو کریںسندھ کے شہر لاڑکانہ میں انسانیت سوز واقعے نے دل دہلا دیے، ذہنی اور جسمانی طور پر معذور 15 سالہ لڑکی مبینہ زیادتی کے بعد زخموں کی تاب نہ لاتے ہوئے اسپتال میں دم توڑ گئی، جبکہ واقعے میں ملوث مرکزی ملزم پولیس مقابلے میں مارا گیا۔
واقعہ رتوڈیرو کے علاقے کمبر ناکہ میں پیش آیا جہاں 11 جولائی کو مذکورہ بچی گھر سے باہر نکلی مگر واپس نہ آئی۔ بچی کے چچا اسد ابڑو کے مطابق، اہل خانہ نے اس کی تلاش شروع کی، تاہم ایک دن بعد لڑکی بے ہوشی کی حالت میں رتوڈیرو اسٹیڈیم کے قریب ملی۔
لڑکی کو تشویش ناک حالت میں فوری طور پر تحصیل اسپتال لے جایا گیا جہاں ڈاکٹر شاہ حسین شاہ، میڈیکل سپرنٹنڈنٹ، نے ابتدائی معائنے میں زیادتی کے شواہد کی تصدیق کی۔ بچی کو بعد ازاں ٹرومہ سینٹر لڑکانہ منتقل کیا گیا، جہاں وہ اتوار کے روز زندگی کی بازی ہار گئی۔
اسی واقعے سے متعلق مرکزی ملزم رضوان عرف کالو کی تلاش میں پولیس نے چھاپہ مار کارروائی کی۔ ضلع ایس ایس پی احمد فیصل چوہدری کے مطابق، پولیس پر حملہ کیا گیا اور جوابی فائرنگ کے دوران ملزم کالو ہلاک ہو گیا۔ ان کا کہنا تھا کہ امکان ہے فائر ملزم کے اپنے ساتھیوں کی طرف سے ہوا ہو، جو موقع سے فرار ہو گئے۔
پولیس حکام کے مطابق، واقعے کی مکمل تفتیش جاری ہے اور فرار ملزمان کی گرفتاری کے لیے چھاپے مارے جا رہے ہیں۔
