وزیر اعظم چاہتے ہیں کہ پاکستان مسلم امہ کی قیادت کرے۔فواد چوہدری

اسلام آباد: وفاقی وزیرِ اطلاعات و نشریات فواد چوہدری نے کہا ہے کہ وزیرا عظم عمران خان کی خواہش ہے کہ پاکستان مسلم امہ کی قیادت کرے جبکہ حکومت نے ملک کو اسلام کا قلعہ بنانے کیلئے سنجیدہ کوششیں کی ہیں۔

تفصیلات کے مطابق اسلام آباد میں میڈیا نمائندگان سے گفتگو کرتے ہوئے وزیرِ اطلاعات فواد چوہدری نے کہا کہ اپوزیشن کے رہنما ملک کی آزاد خارجہ پالیسی اور ملکی خودمختاری کے خلاف متحد ہو گئے ہیں۔ حزبِ اختلاف کو آگے بڑھنے کا راستہ نہیں ملے گا۔

یہ بھی پڑھیں:

اسلام آباد پریڈ گراؤنڈ میں پنڈال سج گیا، وزیر اعظم جلسے سے خطاب آج کرینگے

میڈیا سے گفتگو کے دوران وزیرِ اطلاعات نے کہا کہ عوام کی فلاح و بہبود کیلئے پوری قوم وزیر اعظم کے ساتھ کھڑی ہے۔ تحریکِ عدم اعتماد سے قبل پی ٹی آئی کے قافلے وزیر اعظم سے اظہارِ یکجہتی کیلئے ملک بھر سے اسلام آباد کی طرف مارچ کر رہے ہیں۔

سفارتی محاذ پر پی ٹی آئی حکومت کے اقدامات اجاگر کرتے ہوئے فواد چوہدری نے کہا کہ ملک کی ایک آزاد خارجہ پالیسی ہے اور زمین پر کوئی ایسی طاقت نہیں جس سے پاکستان کو کوئی خطرہ ہو۔ انہوں نے آج کے پی ٹی آئی جلسے کے انتظامات کا بھی جائزہ لیا۔ 

خیال رہے کہ اس سے قبل اسلام آباد کے پریڈ گراؤنڈ میں تحریکِ انصاف حکومت نے پنڈال سجا لیا، وزیرا عظم عمران خان آج تاریخی جلسے سے خطاب کریں گے۔وفاقی وزراء کا دعویٰ ہے کہ جلسے میں عوام کا ٹھاٹھیں مارتا سمندر ہوگا۔ 

وزیر اعظم عمران خان نے گزشتہ روز بھی عوامی رابطہ مہم کے سلسلے میں جلسے سے خطاب کیا تھا۔ وزیر اعظم کا کہنا ہے کہ آج جو جلسہ ہو رہا ہے، یہ اچھائی اور برائی کے ساتھ ساتھ پاکستان کی جنگ ہے۔