فیڈرل بورڈ کے انٹر کے نتائج آج کب جاری ہونگے؟ طلبہ کی دھڑکنیں تیز

اسلام آباد: فیڈرل بورڈ آف انٹرمیڈیٹ اینڈ سیکنڈری ایجوکیشن نے اعلان کیا ہے کہ انٹرمیڈیٹ کے نتائج (گیارہویں اور بارہویں جماعت، حصہ اوّل و دوئم) منگل 26 اگست کو صبح 11 بج کر 30 منٹ پر جاری کیے جائیں گے۔

بورڈ کے مطابق نتائج کے اعلان کی تقریب براہِ راست سرکاری ذرائع سے نشر کی جائے گی، جبکہ طلبہ اپنے انفرادی نتائج فیڈرل بورڈ کی سرکاری ویب سائٹ پر دیکھ سکیں گے۔

مزید برآں، طلبہ معاونت کے لیے ہیلپ لائن 111 032 473 پر رابطہ کرسکتے ہیں یا ویب سائٹ (www.fbise.edu.pk) سے اپنی مارک شیٹس ڈاؤن لوڈ کرسکتے ہیں۔

یہ اعلان حال ہی میں پنجاب کے تعلیمی بورڈز کی جانب سے جماعت نہم کے نتائج جاری کیے جانے کے بعد سامنے آیا ہے جہاں مختلف اضلاع میں طلبہ و طالبات نے نمایاں کارکردگی دکھائی۔

اب تعلیمی شیڈول تیزی سے یونیورسٹی داخلوں کی طرف بڑھ رہا ہے، جس میں انٹرمیڈیٹ کے نتائج کو مرکزی حیثیت حاصل ہے۔

انٹرمیڈیٹ (حصہ اوّل و دوئم) کے نتائج کو اعلیٰ تعلیم کے حصول، وظائف کے لیے درخواست دینے اور مقابلے کے امتحانات میں شرکت کے لیے انتہائی اہم قرار دیا جاتا ہے۔ یہ نتائج میڈیکل، انجینئرنگ اور دیگر پیشہ ورانہ پروگراموں میں داخلوں کے لیے بنیادی حیثیت رکھتے ہیں۔