لیاقت آباد تین ہٹی میں آگ لگنے سے درجنوں جھگیاں خاکستر

کراچی :شہرآگ لگنے کے واقعات تواتر کے ساتھ سامنے آنے لگے، آج صبح لیاقت آباد کے علاقے تین ہٹی کے قریب جھگیوں میں آگ لگ گئی،درجنوں جھگیاں جل گئیں۔

جھگیوں میں لگنے والی آگ نے دیکھتے ہی دیکھتے شدت اختیار کرلی، آگ کے باعث دور دور تک آسمان پر سیاہ بادل دکھائی دینے لگے۔

آتشزدگی کی اطلاع فوری طور پر فائر بریگیڈ کو دی گئی جو حسب روایت تاخیر سے پہنچی اور امدادی کاموں کا آغاز کیا، آگ کی شدت کو مد نظر رکھتے ہوئے مزید دو فائربریگیڈ گاڑی کو طلب کیا گیا۔بعد ازاں فائربریگیڈکی 3 گاڑیوں نے قابو پایا۔

مزید پڑھیں:کورنگی میں آئل ریفائنری کی زیر زمین لائن میں آگ بھڑک اٹھی،6افراد زخمی

آگ لگنے سے 100کے قریب جھگیاں جل گئیں تاہم کسی قسم کا جانی نقصان نہیں ہوا۔چیف فائر آفیسر نے بتایاکہ آگ لگنے کے اس واقعے میں کوئی جانی نقصان نہیں ہوا۔انہوں نے بتایا کہ جھگیوں میں آگ لگنے کی وجہ کا بھی تاحال تعین نہیں کیا جا سکا۔

متاثرین کو خدشات نے گھیر لیا ہے کہ سخت سردی میں انہیں سر چھپانے کی جگہ اب کہاں ملے گی؟بچے اور بڑے جلنے والی جھگیوں کی راکھ میں سے بچا کچاسامان تلاش کرنے میں مصروف نظرآئے۔