لاہور میں طوفانی بارش سے ایک ہی خاندان کے 5 افراد جاں بحق

لاہور: لاہور کے علاقے نشتر کالونی میں تیز آندھی اور طوفان کے باعث مکان کی دیوار گرنے سے ایک ہی خاندان کے 5 افراد جاں بحق اور 1 زخمی ہوگیا۔

تفصیلات کے مطابق نشتر کالونی کے علاقے اعوان مارکیٹ میں ایک گھر کی دیوار گرگئی، جس کے نتیجے میں 5 افراد جاں بحق اور 1 زخمی ہوگیا۔

ریسکیو حکام کا کہنا ہے کہ جب تیز آندھی اور طوفان آیا تو اُس نے زیرِ تعمیر بدقسمت گھر کو اپنی لپیٹ میں لے لیا، جس کے نتیجے میں گھر میں سوتے ہوئے افراد چھت گرنے سے ملبے تلے دب گئے۔

ریسکیو حکام نے بتایا کہ ملبے تلے دبنے کے باعث 5 افراد جاں بحق ہوگئے جبکہ 1 زخمی ہوگیا جسے فوری طور پر مقامی جنرل اسپتال منتقل کیا گیا ہے۔

یہ بھی پڑھیں:

گجرات میں کار نہر میں جاگری، 1کمسن بچے اور 4خواتین سمیت 6افراد جاں بحق

جاں بحق ہونے والوں میں 52 سالہ شبیر احمد، 28 سالہ آمنہ، 18 سالہ شرجیل، 14 سالہ نفیل احمد اور 50 سالہ مسرت بی بی شامل ہیں، لاشیں جنرل اسپتال منقتل کردیا گیا ہے۔

دیوار گرنے سے زخمی ہونے والے کی شناخت 16 سالہ بلال نام سے ہوئی جو ہسپتال میں زیرِ علاج ہے۔

واضح رہے کہ لاہور کے مختلف علاقوں میں گزشتہ رات سے بارش کا سلسلہ جاری ہے۔