وزیر خارجہ بلاول بھٹو زرداری 2روزہ دورے کیلئے ایران آج پہنچیں گے

اسلام آباد: وزیرِ خارجہ بلاول بھٹو زرداری ہمسایہ ملک کے 2 روزہ دورے کیلئے آج ایران پہنچیں گے۔ سرکاری دورے کا مقصد پاک ایران دو طرفہ تعلقات کو فروغ دینا ہے۔

تفصیلات کے مطابق پاکستان اور ایران کے مابین دوطرفہ تعلقات مذہبی و ثقافتی بنیادوں پر استوار ہیں۔ دونوں ممالک کے مابین زائرین کی آمدورفت سارا سال جاری رہتی ہے۔ بلاول بھٹو زرداری ایرانی ہم منصب حسین امیر عبداللہیان کی دعوت پر ایران کا دورہ کرینگے۔

یہ بھی پڑھیں:

بلاول کی ایرانی وزیر خارجہ سے ملاقات، طیارہ بھیجنے پر اظہارِ تشکر

ہمسایہ ملک کے 2 روزہ دورے کے دوران وزیرِ خارجہ بلاول بھٹو زرداری ایران کی اعلیٰ قیادت بالخصوص ایرانی صدر ابراہیم رئیسی اور ایرانی ہم منصب امیر عبداللہیان سے بھی ملاقاتیں کریں گے۔ مشہد کے دورے کے دوران زیارتوں کا شرف بھی حاصل ہوگا۔

خیال رہے کہ اس سے قبل وزیر خارجہ بلاول بھٹو زرداری نے عالمی اقتصادی فورم کے موقع پر ایرانی وزیر خارجہ سے ملاقات کی اور بلوچستان کے جنگلات میں لگی آگ کو بجھانے کیلئے طیارہ بھیجنے پر ایران کا شکریہ بھی ادا کیا۔

 وزیر خارجہ بلاول بھٹو زرداری نے گزشتہ ماہ کے آخر میں ایرانی وزیر خارجہ ڈاکٹر حسین امیر عبداللہیان سے ڈیووس میں ملاقات کی تھی۔ ترجمان دفترِ خارجہ کا کہنا تھا کہ بلاول بھٹو زرداری نے پاک ایران تعلقات کو مضبوط بنانے کی پاکستان کی خواہش کا اعادہ کیا۔