گوگل نیوز پر ہمیں فالو کریںاسلام آباد: وفاقی دارالحکومت میں سپریم کورٹ کی کینٹین میں گیس سلنڈر پھٹنے سے چار افراد زخمی ہو گئے
منگل کے روز پیش آنے والے اس واقعے کے نتیجے میں زخمیوں کو فوری طور پر اسپتال منتقل کیا گیا جبکہ بم ڈسپوزل اسکواڈ کی ٹیم بھی سپریم کورٹ پہنچ گئی اور شواہد اکٹھے کرنے کا عمل شروع کر دیا۔
دھماکے سے کینٹین کا فرنیچر اور دیگر سامان شدید متاثر ہوا۔ حکام نے واقعے کی تحقیقات کا آغاز کر دیا ہے۔
ابتدائی رپورٹ کے مطابق یہ دھماکا ایئر کنڈیشنر کے گیس پلانٹ میں مرمتی کام کے دوران ہوا جس کے نتیجے میں چار افراد زخمی ہوئے۔
عینی شاہدین کا کہنا ہے کہ دھماکے کی آواز اتنی شدید تھی کہ عدالتوں میں موجود وکلاء گھبراہٹ کے عالم میں اپنے چیمبرز سے باہر نکل آئے۔
یہ امر قابلِ ذکر ہے کہ ملک کے مختلف شہروں میں ماضی میں بھی متعدد سلنڈر دھماکے پیش آ چکے ہیں، جن میں قیمتی انسانی جانوں کا ضیاع ہوا۔
ماہرین کے مطابق ایسے واقعات کی بڑی وجوہات میں ناقص اور غیر معیاری سلنڈرز کا استعمال، حفاظتی معائنوں کا فقدان، اور سی این جی ریگولیشنز اور حفاظتی اصولوں پر عمل نہ کرنا شامل ہے۔
