گلگت بلتستان کو صوبہ بنانے کا عمل آخری مرحلے میں داخل

اسلام آباد: پی ٹی آئی کی وفاقی حکومت نے گلگت بلتستان کو صوبہ بنانے کے عمل کو حتمی شکل دے دی، عبوری صوبے کے قیام کے متعلق اسٹیک ہولڈرز کے مابین مشاورت بھی مکمل کر لی گئی جبکہ قانون ساز اسمبلیوں میں نشستوں کی تعداد پر بھی اتفاقِ رائے پایا جاتا ہے۔

تفصیلات کے مطابق گلگت بلتستان صوبہ بننے کے بعد نئے صوبے کے عوام قومی اسمبلی میں 3 جنرل اور 1 مخصوص نشست کے ذریعے نمائندگی حاصل کرسکیں گے۔ ایوانِ بالا میں جی بی کی 7 نشستیں ہوں گی جبکہ این ایف سی میں 4 فیصد حصہ مقرر کیے جانے کے امکانات ہیں۔

یہ بھی پڑھیں:

وزیر اعظم عمران خان کا روس سے واپسی پرکراچی آمد کا فیصلہ

وفاقی حکومت گلگت بلتستان کو صوبہ بنانے کا اعلان جلد کرے گی جس کا بل قومی اسمبلی کے علاوہ گلگت بلتستان اسمبلی میں بھی پیش ہوگا۔ اراکینِ اسمبلی سے بل کی حمایت کیلئے معاملات طے پا گئے جبکہ عبوری صوبے کے قیام کیلئے جی بی اسمبلی تحلیل کردی جائے گی۔

چیف کورٹ گلگت بلتستان کا نام بدل کر ہائیکورٹ جی بی رکھے جانے کا امکان ہے۔ سپریم ایپلٹ کورٹ جی بی کی جگہ سپریم کورٹ گلگت بلتستان رجسٹری قائم کی جائے گی جیسا کہ کراچی اور لاہور میں موجود ہے۔ دیگر اداروں میں تبدیلیوں اور تحلیل کے معاملات پر بھی اتفاق کر لیا گیا۔

موجودہ گلگت بلتستان حکومت کی تحلیل کے بعد آئندہ عام انتخابات دیگر صوبوں کے ہمراہ 2023 میں منعقد کرنے کا فیصلہ کیا گیا ہے۔ موجودہ اسمبلی ڈھائی سال کے بعد جی بی کونسل کے ہمراہ تحلیل ہوجائے گی۔ آئین پاکستان میں ترمیم کیلئے بل کو حتمی شکل دے دی گئی۔