سندھ میں غیر معمولی بارشیں، حکومت کا متاثرین کی امداد کا اعلان

کراچی: وزیرِ اطلاعات سندھ شرجیل انعام میمن کا کہنا ہے کہ سندھ میں رواں برس مون سون کے دوران غیر معمولی بارشیں ہوئیں جس سے شہری انفراسٹرکچر اور دیہی علاقوں میں فصلوں کو شدید نقصان پہنچا۔حکومت نے متاثرین کی امداد کا اعلان کیا ہے۔

تفصیلات کے مطابق وزیرِ اطلاعات سندھ شرجیل انعام میمن نے اپنے ایک بیان میں کہا کہ سندھ میں مون سون کی غیر معمولی بارشوں کے حالیہ اسپیل سے حیدر آباد، جامشورو، دادو، ملیر، عمر کوٹ، مٹیاری، ٹنڈو محمد خان، ٹھٹھہ، بدین اور سجاول زیادہ متاثر ہوئے۔

یہ بھی پڑھیں:

ملیر ندی میں ڈوبنے والے 2 افراد کی لاشیں مل گئیں

بیان میں وزیرِ اطلاعات سندھ شرجیل میمن نے کہا کہ سندھ حکومت امدادی کارروائیاں جاری رکھے ہوئے ہے۔ تمام متاثرہ اضلاع میں سندھ کابینہ کے اراکین امدادی کارروائیوں کی نگرانی کر رہے ہیں جبکہ پی ڈی ایم اے متاثرہ علاقوں میں ٹینٹ اور راشن پہنچا رہی ہے۔

صوبائی وزیر شرجیل انعام میمن نے کہا کہ بارش سے متاثرہ علاقوں سے نکاسئ آب کیلئے مشینری بھی پہنچائی جارہی ہے۔ وزیرِ اعلیٰ سندھ کی ہدایت پر تمام متاثرہ اضلاع کے ڈپٹی کمشنرز کو امدادی کارروائیوں کیلئے 30،30 لاکھ روپے جاری کیے گئے ہیں۔

وزیرِ اطلاعات سندھ نے کہا کہ ضلعی انتظامیہ کو متاثرہ خاندانوں کو اسکولز میں متبادل رہائش فراہم کرنے کی ہدایت جاری کردی گئی ہے۔ سندھ حکومت بارشوں کے باعث ہونے والے جانی و مالی نقصان کا ازالہ کرے گی۔ وزیر اعلیٰ نے ڈیٹا طلب کر لیا۔

انہوں نے کہا کہ وزیر اعلیٰ نے محکمۂ صحت اور بلدیات کو گیسٹرو، ملیریا اور ڈینگی کا پھیلاؤ روکنے کیلئے ضروری اقدامات کی بھی ہدایات جاری کردیں۔ متاثرہ خاندانوں کو بے نظیر انکم سپورٹ پروگرام  کے تحت بھی مالی مدد فراہم کی جائے گی۔