اپنی شاہ خرچیاں کم نہیں ہونگی اور، حکومت ریٹائرڈ ملازمین کی پنشن میں کٹوتی کیوں کرنا چاہتی ہے؟

پاکستان حکومت ریٹائرڈ ملازمین کی پنشن میں یکمشت اضافے کو ختم کرنے کا امکان ہے، حکومت ریٹائرڈ سرکاری ملازمین کی پنشن میں یکمشت اضافے کو مرحلہ وار ختم کر سکتی ہے۔

وزارت خزانہ نے اشارہ دیا ہے کہ پنشن میں گزشتہ 2 سالوں کے افراط زر کے اعداد و شمار کے مقابلے میں 80 فیصد اضافہ دیکھا جا سکتا ہے۔

حکومت نے رواں مالی سال کے دوران پنشن میں 15 فیصد اضافے کا اعلان کیا ہے۔حکومت آئندہ مالی سال میں مہنگائی کو سنگل ہندسوں پر قابو میں لانے کا ہدف رکھتی ہے۔

پنشن ایڈجسٹمنٹ کا نیا طریقہ قومی بجٹ پر پنشن کے بڑھتے ہوئے بوجھ کو کم کرنے کی کوششوں کا حصہ ہے۔ سرکاری دستاویزات کے مطابق رواں مالی سال حکومت نے پنشن کے لیے 1014 ارب روپے مختص کیے تھے۔

پنشن میں اضافے کو مہنگائی سے جوڑنے کی تجویز ابتدائی طور پر پے اینڈ پنشن کمیشن 2020 نے دی تھی۔ پنشن ایڈجسٹمنٹ کا تعین کرنے کے لیے مہنگائی کا ڈیٹا اسٹیٹ بینک آف پاکستان فراہم کرے گا۔

11 ستمبر کو وزارت خزانہ نے پنشن رولز میں تین اہم ترامیم کے حوالے سے نوٹیفکیشن جاری کیا۔

نوٹیفکیشن کے مطابق فیملی پنشن اب 10 سال تک محدود ہو گی جب کہ پنشنر کے انتقال کی صورت میں صرف قانونی ورثا ہی پنشن منتقل کرنے کے اہل ہوں گے۔

نوٹیفکیشن میں کہا گیا ہے کہ مرنے والے پنشنر کی شریک حیات کو ان کی موت کے بعد 10 سال تک پنشن ملتی رہے گی۔ اگر فوت شدہ پنشنر کا بچہ معذور ہے، تو وہ تاحیات پنشن حاصل کرنے کے اہل ہوگا۔