گوگل نیوز پر ہمیں فالو کریںبالی ووڈ اور ٹی وی انڈسٹری میں کئی ایسی اداکارائیں ہیں جنہوں نے مختلف مذاہب سے تعلق رکھنے والے افراد سے شادی کی۔ اگرچہ وہ اپنی ذاتی زندگی میں خوش ہیں لیکن سوشل میڈیا پر ٹرولز انہیں مسلسل تنقید کا نشانہ بناتے ہیں۔ ایسی ہی ایک مشہور ٹی وی اداکارہ آمنہ شریف ہیں جو خود مسلم ہیں اور انہوں نے ہندو شخص امت کپور سے 2013 میں شادی کی۔ اس جوڑے کا ایک بیٹا بھی ہے لیکن آمنہ کو بین المذاہب شادی کی وجہ سے اکثر سوشل میڈیا پر تنقید کا سامنا کرنا پڑتا ہے۔
ایک حالیہ انٹرویو میں آمنہ شریف نے اس ٹرولنگ پر کھل کر بات کی۔ انہوں نے کہا کہ سب سے اہم بات یہ ہے کہ انسان اچھا ہو۔ اگر آپ اچھے انسان ہیں تو آپ کا ساتھی کس مذہب سے تعلق رکھتا ہے اس سے کوئی فرق نہیں پڑتا۔
آمنہ نے بتایا کہ وہ روزانہ نماز پڑھتی ہیں اور جب وہ مندر کے سامنے سے گزرتی ہیں تو وہاں بھی احترام کے ساتھ آشیرواد لیتی ہیں۔ ان کا ماننا ہے کہ ہر مذہب کا احترام کرنا ضروری ہے اور یہ انسان کے اپنے عقیدے پر منحصر ہے کہ وہ کس چیز پر یقین رکھتا ہے۔
آمنہ نے ٹرولز کے بارے میں کہا کہ شروع میں لوگ بہت غیر ضروری باتیں کرتے تھے۔ وہ حیران ہیں کہ لوگوں کے پاس اتنا وقت کہاں سے آتا ہے کہ وہ دوسروں کے سوشل میڈیا اکاؤنٹس پر جا کر تنقید کریں۔ انہوں نے مزید کہا کہ پہلے ایسی باتوں کا اثر ہوتا تھا لیکن اب وہ ان سب کو نظر انداز کرتی ہیں اور اپنی زندگی میں آگے بڑھ رہی ہیں۔
